Таатта улууһугар барыта 30 хочуолунай баар. Кыстыгы туоруурга чоҕунан хайдах хааччыллан олороллорун, төһө саппаастаахтарын билистибит.
“Төлөн” АУо сүрүн инженера Виктор Кондрашов иһитиннэриититтэн:
— Биһиги тэрилтэбит Илин эҥэр улуустарын таас чоҕунан хааччыйар. Күҥҥэ 1,5 тыһ. тонна тиэйэбит. Ол эрээри ОДьКХ ГУП иэһэ күн бүгүҥҥэ диэри төлөнө илик буолан, бу дьыл сэтинньи 10 күнүттэн чоҕу тиэйиигэ хааччахтааһыны киллэрбиппит. Ол курдук Таатта уонна Амма улууһугар күҥҥэ 450 тонна, Чурапчы улууһугар 250 тонна чоҕу тиэйэллэр. Сэтинньи 30 күнүнээҕи туругунан уопсайа 125 тыһ. тонна чоҕу тиэйдибит. Онон төһө да иэс үлэлии олордорбут, ОДьКХ уонна чааһынай дьоҥҥо күннээҕи оттор нуормаларын биэрэ олоробут.
ОДьКХ ГУП Тааттатааҕы филиалын сүрүн инженера Дьулустан Попов:
-Билиҥҥи туругунан улууспут хочуолунайдарыгар уопсайа 5700 тонна саппаас чох баар, ол 14 күҥҥэ тиийэр. Учаастактарга барыллаан 10 күҥҥэ тиийэр саппаастаахтар. Чоҕу тиэйии былаан быһыытынан барар, күҥҥэ 450 тонна тиэллэн кэлэр. Ыраах нэһилиэктэргэ хааччыллыы үчүгэй, бу күннэргэ Даайа Амматыгар чоҕу тиэйии саҕаланыахтаах.
Бу курдук сүрүн кыһалҕа — үп тиийбэтин үрдүнэн кыстыгы этэҥҥэ туоруур туһугар үлэлэһэллэр. Манна даҕатан аҕыннахха, Саха Республикатын Ил Дарханын уонна Саха Республикатын Бырабыыталыстыбатын пресс-сулууспатын суруйуутуттан:
“Саха Республикатын Ил Түмэнин XIV (уочараттаах) пленарнай мунньаҕын маҥнайгы ааҕыытыгар республика бюджетыгар инники үс сылга “Хаачыстыбалаах олох-дьаһах өҥөтө уонна энергетика сайдыыта” судаарыстыбаннай бырагыраамманы үбүлээһини балайда улаатыннарар былааннаахтар.
Ол курдук 2026 сылга ОДьКХ салаатыгар 43,6 млрд солк. көрүллүө, ол 2025 сылтан 5,9 млрд солк. элбэх. Үбүлээһин эбиллиитэ сүрүннээн ОДьКХ субсидияларыгар уонна инфраструктураны сайыннарыыга барыаҕа”,- диэн Саха Республикатын үп миниистирин э.т. Иван Алексеев этэр.
(Сиһилии: https://mingkh.sakha.gov.ru/news/14315)
Сарыал Кыыма