Орто Амма нэһилиэгэр ыһыах күн биһиги сэттэ бииргэ төрөөбүт оҕолор төрөппүттэрбит үлэ, тыыл ветераннара Виктор Куприянович Афанасьев, Татьяна Артемьевна Васильева быйыл 100 саастарын туолалларынан, Кыайыы 80 сылынан нэһилиэкпит ыччаттарыгар анаан истиҥ сыһыан, таптал, дьол ыскамыайката туруордубут.
Бу үтүө, кэрэ миэстэни сүрэхтээһин бэрт сэргэхтик, боччумнук ыытылынна. Тэрээһин балтыбыт, библиотечнай үлэ бэтэрээнэ, ССРС культуратын туйгуна И.В.Харлампьева, эдьиийбит педагогическай үлэ бэтэрээнэ, СР үтүөлээх учуутала, Харбалаах бочуоттаах олохтооҕо В.В.Блахирова, сиэн балтыбыт, олохтоох дьаһалта баһылыгын солбуйааччы А.И.Васильева тыл алгыс тылларынан, баар дьону алаадьынан күндүлээһининэн саҕаланна. Ыскамыайка турар миэстэтигэр киириигэ лиэнтэни нэһилиэк Аҕа баһылыга А.И.Кулачиков, эдьиийбит, Таатта улууһун норуотун маастара, СР уус-уран оҥоһугун маастара, нэһилиэк бочуоттаах олохтооҕо А.В.Афанасьева, эдьиийбит, педагогическай үлэ бэтэрээнэ, норуот үөрэҕириитин туйгуна Л. Н.Малышева, төрөппүттэрбит улахан хос сиэннэрэ Ю.А. Васильев лиэнтэни быһыылара буолла.
Үөһээ ыскамыайка өйөнөрүгэр Харбалаах бастакы тутааччыта, «Коммунизм» совхоз комсомолларын салайбыт, советскай-партийнай үлэ бэтэрээнэ, убайбыт Артёмий Викторович Афанасьев-Артыамый
хоһооно сурулунна:
Аммам ыраас уута,
Мүөттээх ыраас салгына,
Чуумпу сулустаах халлаана
Ахтыбыт сүрэхпин уоскутар…
Ыскамыайка алын өйөбүлүгэр Харбалаах бөһүөлэгин тупсаран оҥорууга уонна көҕөрдүүгэ «ССРС НХСБ эдэр кыттыылааҕа» мэтээллээх, педагогическай үлэ бэтэрээнэ, кыра эдьиийбит Александра Викторовна Федорова-Хотолдьуйа Хотун хоһооно суруллубут:
Тыа сирэ — ыччат романтиката
Түмпүтэ Саха сирин,
Дьэндэйбитэ Харбалаах,
Дьол, таптал уйата!
Маннык төрөөбүт дойдуга истиҥ тапталы, үлэҕэ өрө күүрүүнү иҥэриммит ыскамыайканы сиэн бырааппыт Егор Егорович Блахиров салайан оҥоттордо уонна бырааппыт, үгүс сылларга Харбалаахха солбуллубат бэтэрээн сварщик, оҕолорбут наставниктара Юрий Викторович Афанасьев салалтатынан Аммабыт кэрэ көстүүлээх биэрэгэр цемент олбохтоон, Аммабыт хайатын бөдөҥ таастарынан ыллыктаан, Эбэбитигэр хааман киирэргэ таастары уурталаан, паарка күрүөтүн реконструкциялаан, ыскамыайкаҕа тахсарга аан оҥорон, сынньанарга үтүө миэстэни оҥордулар.
Биһиги төрөппүттэбит тус уонна общественнай олоҕу өрө туппут, элбэҕи билэр-көрөр
сатабыллаах, дьаһаллаах, сайаҕас дьон этилэрэ. Кинилэр тус олохторунан биһиэхэ төрөөбүт
дойдуга дириҥ тапталы, дьоҥҥо-сэргэҕэ сайаҕас, ытыктабыллаах сыһыаны, үлэҕэ бэриниилээх, эппиэтинэстээх буолууну, олоххо дьулууру, тулууру иҥэрбиттэригэр махталбытынан бүгүҥҥү олохпут салаллар.
Бу дойдубутугар, бар дьоммутугар үтүө санааттан саҕыллан оҥоһуллубут ыскамыайкабыт Харбалаахпыт ыччатыгар ананар. Амма эбэбит сэмэйдик наҕылыйа устарын, тулалаан турар дьикти айылҕа көстүүтүгэр суулана олорон дуоһуйа сынньаныахтара, атын сирдэргэ олохсуйбут ыччаттар куүс-сэниэ иҥэриниэхтэрэ. Бу үтүө миэстэ эйгэтэ ыччаттарбыт айар-тутар туруктарын арыйдын, уһуну-киэҥи түстээтин, кэрэни-сайдыыны үрдэттин!
Саастаах дьон сэһэргэһэр, эдэрдии өрө көтөҕүллэр миэстэбит буолуохтун!
Дойдулаах дьон дьоллоохпут!
Изабелла Харлампьева, ССРС культуратын туйгуна, библиотека үлэтин бэтэрээнэ.