Таатта улууһуттан баһылык Айаал Семенович Бурцев салайааччылаах нэһилиэк баһылыктара, партия чилиэттэрэ — уонтан тахса киһилээх делегация “Түмүк баар” регионнааҕы отчуоттуур форумҥа кыттыыны ыла сылдьар.
Форум объектарга сылдьыыттан саҕаланна. Бастакынан, Республикатааҕы онкологическай диспансерга үлэ хаамыытын билистилэр. Бу диспансер дойдубут Президенэ Владимир Путин көҕүлүүр “Доруобуйа харыстабыла” национальнай бырайыак чэрчитинэн тутуллубута. Форум кыттыылаахтара аныгы технология кыаҕын туһанан медицина өҥөтө тупсубутун илэ харахтарынан көрдүлэр.
Салҕыы Сайсары күөл оҥоһуулаах кытылыгар тиийэ сырыттылар. Күн бүгүн Дьокуускай куорат олохтоохторо сөбүлээн сылдьар, сынньанар сирдэрэ “Формирование комфортной городской среды” диэн федеральнай проект көмөтүнэн саҥардыллыбыт. Бу “Триумф” спортивнай киин аттыгар Сайсары күөл үрдүгэр турар сынньалаҥ былаһааккатыгар күннэтэ оҕо-аймах, ыччат дьон, эдэр ийэлэр хото сылдьаллар.
Форум кыттыылаахтара экскурсияны М.Е.Николаев аатын сүгэр 40№-дээх оскуолаҕа түмүктээтилэр. Ыалдьыттары оскуола үөрэнээччилэрэ сахалыы сиэринэн кымыһынан, алаадьынан айах тутан көрсүтүлэр. Директор Галина Прокопьевна Васильева былырыын үлэҕэ киирбит саҥа үөрэх тэрилтэтин кэритэн көрдөрдө. Форум кыттыылаахтара аныгы олох ирдэбилигэр бары өттүнэн эппиэттиир оскуоланы сөҕө-махтайа көрдүлэр.
Күн иккис аҥарыгар делегаттар араас хайысхаларынан “Төгүрүк остуол” тула олорон кэпсэтиэхтэрэ. Форум пленарнай мунньаҕынан түмүктэниэҕэ.
Галина ПОЛУСКИНА.