Сомоҕолоһуу күнүн көрсө алтынньы 31 күнүгэр Ытык Күөлгэ «Алгыстаах Таатта – Доҕордоһуу түһүлгэтэ» диэн үҥкүү киэһэтинэн «Дружба» оҕо үҥкүү народнай ансаамбыла 57-с айар үлэтин арыйда.
Дьоро киэһэҕэ “Айылҕа оһуора”, “Алаас оҕолоро”, “Алыптаах кырдал”, “Хомус”, “Кымыс үрдэ” сахалыы үҥкүүлэр “дойду тыына – үҥкүү тыла – куйаар тэтимэ” диэн биир ситиминэн толорулуннулар. Сайын кэлиитэ, сир-дойду уһуктуута, араҕас далбар буолан киэркэнэрин санатан, сир симэхтэрэ күнү уруйдуур үөрүүлэрин үҥкүүһүттэр көрдөрдүлэр. Киһи хараҕын симтэҕинэ толоон мүөттээх сыта кэлэн ааһар курдук турукка киллэрдилэр. Үҥкүү — култуурунай куодтартан турар култуура биир сүдү айымньыта буолан көрөөччү ис эйгэтин арыйар, алыптыыр күүһэ улахан. Эн көрөн астынаҕын эрэ буолбатах, омуккунан киэн туттууҥ, дойдугар тапталыҥ күүһүрэр. Ол курдук, хас биирдии тэбис тэҥ хамсаныы, олох оһуорун ойуулааһын, күҥҥэ сүгүрүйүү, биир сомоҕо буолууну көрдөрүү, биир тэтимҥэ ойуу — бу омук култуурата, сиэрэ-туома. Маны көлүөнэттэн көлүөнэҕэ үҥкүү тылын сүтэрбэккэ тутан иһэллэрин киһи сөҕөр, үрдүктүк сыаналыыр.
Маннык хамсаабат үйэлээх халыыптары (традиции) аныгы үйэ ураты формаларынан ситэрэн (современные интерпретации), уратытык чочуйан (креативность), тэтимин түргэтэтэн (ритм движения) көрдөрүү үҥкүүнү өссө тупсарар, киэркэтэр. Бүгүҥҥү күҥҥэ оҕолор омуктарын уонна кини ураты култууратын билэллэригэр, атын омуктан арааран өйдүүллэригэр туруоруллубут татаар, бүрээт, монгол норуоттарын үҥкүүлэрэ хас биирдии омук майгытын-сигилитин арыйдылар, омугун култууратын хайдахтаах курдук өрө тутарын көрдөрдүлэр, бэйэ бэйэҕэ ытыктабыллаах сыһыа туоһута буоллулар. Маны сэргэ Өксөкүлээх Өлөксөй 1910 сыллаахха суруйбут “Ойуун түүлэ” айымньытын ис хоһоонун сэгэттилэр, историяны кытта сибээстээтилэр.
«Дружба» оҕо үҥкүү народнай ансаамбылын кэнсиэригэр өрүү саала иһэ тобус толору оҕо, төрөппүт, эбээ-эһээ, аймах бука бары БИИР буолуубут, «Дружба» – киэн туттуубут буоларын туоһута. Бу киэһэ дойдугар, дьоҥҥор, омуккар бэриниилээх буолуу — дойдуһа киһи буолуу (патриот) диэн төрүт өйдөбүллэр барыбытын ситимнээтилэр. Өрүү да маннык буоллун диэн, оҕо үҥкүү народнай ансаамбыла, салайааччы Валентин Константинович Козлов мындыр үлэтинэн, «Дружба» быйылгы сезоҥҥа сыалын-соругун туруорда, айар үлэтин саҕалаата. Айымньылаах үлэ аныгы үйэ кыһалҕаларын ааһарга, омук тыыннаах хаалар суолларын тобуларга тирэх буолан, сырдыкка, кэрэҕэ оҕолорбутун сирдиир суола Алгыстаах буоллун!
Изабелла СИВЦЕВА,
Улуустааҕы норуот айымньытын дьиэтин салайааччыта, п.н.к.