Евдокия Попова сахалыы видео-ырысыаптардаах кинигэтэ таҕыста

Евдокия Попова сахалыы видео-ырысыаптардаах кинигэтэ таҕыста

Хас биирдии бырааһынньыгы клубника, фрукта киэргэтиилээх, ууллубут сакалааттаах минньигэс туорт киэргэтэр. Дьиҥэр, туорт арааһын баҕалаах киһи бэйэтэ астыан, чугас дьонун үөрдүөн, онтон астыы үөрэннэҕинэ эбии дохуот оҥостуон сөп. Киһи ис сүрэҕиттэн иэйэн-куойан, кыһаллан туран оҥордоҕуна сатаабатаҕа суох.

Олунньу 27 күнүгэр өрөспүүбүлүкэтээҕи Медиакииҥҥэ эдэр урбаанньыт, этно блогер, «Уютно» иһит маҕаһыынын хаһаайката Евдокия Попова «Minniges» видео-ырысыаптардаах кинигэтин сүрэхтэниитэ буолан ааста. Элбэх хаартыскалардаах, хаачыстыбалаах, киһи илиитигэр тутар эксклюзивнай дьоһун кинигэтигэр классическай, аныгы үйэҕэ киэҥник тарҕаммыт туортар уонна синнабон, капкейк курдук минньигэс астар ырысыаптара киирдилэр.

Ырысыаптар сахалыы тылынан суруллубут буолан, өйдөнүмтүөлэр, оттон туттуллар бородууктата бэрт судургу, бэл Уһук хоту олорор тыа сирин олохтоохторо чугастааҕы маҕаһыынтан атыылаһыахтарын сөп. Кинигэни ааҕа олорон, суотабай төлөпүөнүҥ хаартыскаҕа түһэрэр камератын холбоон, куар-куоду арыйдаххына, «YouTube» ситимигэр киирэн, видеону көрө-көрө кинигэ ааптарын кытта бииргэ астыыр кыахтанаҕын.

Брауни, Сникерс, Кыһыл баархат, Тирамису, Үс сакалаат о.д.а. туортары Евдокия хайдах астыырын хас биирдии туттунуутун көрөн олорон сатаабат да киһи үөрэниэх курдук.

Пресс-кэмпириэнсийэни продюсер Елена Аммосова аһаҕас кэпсэтии, санаа үллэстиитин курдук тэрийэн ыытта. Кинигэ ааптара Евдокия Попова 2016 с. дьиэтигэр икки кыра оҕолоох олорон сакааска туорт астаан саҕалаабытын, билигин маҕаһыын арыйан, ол дьарыгын тохтоппутун да үрдүнэн, сакаасчыттара эрийэ туралларын туһунан кэпсээтэ.

Оччолорго үстээх кыыһа, биирдээх уола ийэлэрин атаҕар эриллэ тураллара, оттон Евдокия тиэстэтин мэһийэн, түүн хойукка диэри туордун киэргэтэрэ. Кини илиитин сылааһынан тыһыынчанан туорт оҥоһуллан, үгүс ыал бырааһынньыктааҕы остуолун киэргэттэҕэ.

«Кондитер идэтин тулуурдаах, дьулуурдаах уонна идэлэрин таптыыр дьон баһылыыллар дии саныыбын. Сарсыардаттан киэһэ хойукка, ардыгар түүҥҥэ диэри атахтарыгар туран эрэ үлэлииллэр. Ол эрэн туорт эйгэтэ үөрүү-көтүү, дьол суһума буолан, барыта чэпчэкитик оҥоһуллар эбит. Киһи таптыыр дьыалатынан дьарыктаннаҕына, үгүһү ситиһэн, халлааҥҥа да көтүөн сөп.

«Minniges» кинигэбэр туорт уонна десерт 35 ырысыаба киирдэ, 150 лиистээх, «Офсет» хампаанньаҕа 2500 экземплярынан бэчээттэнэн таҕыста. Кинигэ оҥоһуутугар табаарыстарым, Кэрэли уонна Тимир Кириллиннэр хаартыскаҕа түһэрэн уонна дизайнын оҥорон көмөлөстүлэр.

Кинигэ аата Сэмэн Новгородов сахалыы алпаабытынан оҥоһулунна. Оҕону сахалыы иитиигэ, санааны төрөөбүт тылынан тиэрдиигэ сэмэй кылааппын киллэрэрбиттэн үөрэбин», — диэн билиһиннэрдэ Евдокия Попова.

Кини уу сахалыы кэпсии-кэпсии маастар-кылаас көрдөрөр видео ырысыаптардаах кинигэтин куукунаҕа уура сылдьан, ийэттэн кыыска, сиэннэргэ, көлүөнэттэн көлүөнэҕэ биэрэн иһиэххэ сөп.

Евдокия Попова сахалыы тыллаах блогердартан биир саамай улахан аудиториялаах, 65 тыһыынча сурутааччылаах. Аһылыгы астыырга уопсайа 18 000 тиражтаах кинигэлэри атыылаабыт.

Кини бу иннинэ «Күһүҥҥү киһи күлбүтүнэн», «Саҥа Дьылга тугу астыыбыт?», «Ийэм +мин = минньигэс ас», “Дьэрэ, астыахха Евдокиялыын!” кинигэлэрэ күн сирин көрбүттэрэ. Евдокия ыал аайы баар астан сонун бүлүүдэ ырысыаптарын оҥорбутун сурутааччылара баара-суоҕа биир нэдиэлэ иһигэр былдьаһыгынан атыыласпыттара. Ити онлайн бырайыактары атыылаан, кини «Айсберг» атыы-эргиэн киинин 4 этээһигэр «Уютно» диэн иһит маҕаһыынын арыйбыта.

Этно блогер сөбүлүүр дьарыгын, ас астааһыны хаартыскаҕа, видеоҕа устан, ырысыаптарын дьону кытта үллэстэр. Ол иһин Евдокия сурутааччыта күн ахсын эбиллэн, кэҥээн иһэр.

Кинигэ сүрэхтэниитигэр кэлбит дьон Евдокия сахалыы тылынан минньигэс уонна сонун ас ырысыабын түмэн кинигэ оҥорбутун сэргииллэрин уонна биһирииллэрин биллэрдилэр.

Кинигэ ааптара ырысыаптарын нууччалыы оҥорон, Арассыыйа таһымыгар тахсыан сөп эрээри, ыал ийэтэ оҕолорун кытта төрөөбүт төрүт тылбытынан кэпсэтэн, бииргэ астыы үөрэтиэхтээх диэн санаанан салайтаран, кинигэлэрин барытын сахалыы тылынан таһаарарын бэлиэтээтэ.

Оҕо иитиитэ, ыал олоҕо ийэттэн саҕаланар, кини дьиэ кэргэнин минньигэс астаах сандалы тула мунньар. Онон санааны сахалыы этэн, сахалыы толкуйдаан, өбүгэ үгэһин үйэтитэргэ сэмэй кылаатын киллэрэр эдэр блогеры киһи эрэ сэргии көрөр.

Марианна Тыртыкова