Ийэм барахсан, педагогическай үлэ бэтэрээнэ, учууталлар учууталлара Клара Степановна Постникова бүгүн 92 сааһын туолла!
Кини 1934 с. бэс ыйын 24 күнүгэр Баайаҕаҕа Кыыс Тахсыбыт диэн сиргэ төрөөн биһигин ыйаабыта. Аҕата Баайаҕаттан төрүттээх, тэрэпиэһинньик уола Луковцев Степан Афанасьевич 1925 с. 20 сааһыгар учуутал буолбут. Баайаҕа оскуолатыгар дириэктэрдии сылдьан оскуола туттарбыт, сэрии саҕана тулаайах оҕолору нэһилиэктэринэн хомуйан Уолбаҕа детдом астарбыт, Өлөөн оройуонугар үөрэх чааһын сэбиэдиссэйинэн, Нам Хамаҕаттатыгар, Республикатааҕы Лесной оскуолаҕа, Мэҥэ Алдан, Алдан Учурун оскуолаларыгар учууталлаабыт, дириэктэрдээбит, Минпроска иниспиэктэрдээбит. Ону таһынан улахан дьону үөрэтэр ааҕар балаҕаннарга, араас общественнай үлэлэргэ көхтөөхтүк кыттыбыт, оҕуруот аһын үүннэриини, тэллэйи үргээн туһаныыны көрдөрбүт, көлө күүһүнэн үлэлиир миэлиҥсэни олоххо киллэрбит.
Онтон эбэм Анна Степановна (Николаева) Билиҥҥи Томпо Мэҥэ Алданыттан төрүттээх, кэрэ дьүһүннээх далбар хотун биэс оҕону төрөтөн, улаатыннартаан иһэн, ийэбит биэс саастааҕар, тымныйан ыалдьан өлөөхтөөбүт. Оччолорго оҕолортон кыралара Валентина иринньэх оҕо эбит.
Эһэбит кыры-кырбас биэс оҕотун уонна эдьиийиттэн төгүрүк тулаайах хаалбыт өссө биэс оҕону иитэн улаатыннартаан киһи оҥортообут. Дириэктэр үлэтэ элбэх буолан куруук ыйы-ыйынан командировкаларга сылдьар кэмигэр оҕолор бэйэлэрэ эрэ хаалан, сороҕор ыалларын көмөлөрүнэн, аҕалара хаалларбыт нуорма бурдуктарынан лэппиэскэлэрин, хааһыларын буһарынан сиэхтииллэр эбит. Оччолорго төһө да аас-туор кэмнэр буоллаллар, аҕалара биирдэ даҕаны детдом аһын-таҥаһын оҕолоругар аҕалбатах. Ийэбит детдом оҕолорун дьэрэкээн таҥастарыгар, минньигэс астарыгар ымсыыралларын, кыра сылдьан куруук ийэтин уҥуоҕар барарын, кэпсэтэрин, онно бэл утуйарын туһунан ахтарын киһи уйадыйбакка эрэ истибэт суола… Оттон детдомҥа улааппыт, судаарыстыба көрүүтүгэр-харайыытыгар иитиллэн тыыннаах хаалбыт оҕолор, билигин саастаах дьон, махталларын элбэхтэ үөрэ истэбин.
Ийэбит Өлөөҥҥө саҥа аһыллыбыт орто оскуола биир бастакы выпускниктарын кытары бүтэрэн, Баайаҕа библиотекатыгар үлэлиир уонна СГУ нуучча тылын уонна литературатын салаатын биир бастакы выпустарын кытары 1962 с. үөрэнэн бүтэрэр. Устудьуоннуу сылдьан аҕабын, саха тылын уонна литературатын устудьуона, кэлин РФ суруйааччыларын сойууһун чилиэнэ буолбут Федор Федорович Постниковы-Арчы Сүөдэри көрсөн 1960 с. тапталларын холбоон, ыал буолаллар. Аҕабыт күн сириттэн күрэниэр диэри 52 сыл дьоллоохтук олордулар, түөрт оҕону төрөтөн атахтарыгар туруордулар, сиэн, хос сиэн тапталын биллилэр.
Манна эбэн эттэххэ, 1962 с. от ыйын 3 күнүгэр чаҕылҕан дапсыйан сындыыстыы субуруҥнуур, этиҥ лүһүгүрүүр күнүгэр төрүүрбэр – ийэм үрдүк үөрэҕи бүтэрэр дипломугар илии баттаммыт. Аҕам бүтэһик судаарыстыбаннай экзаменын уонна мин төрөөбүппүн бииргэ үөрэнэр доҕотторо Баһылай Бырдьахаанныын, Кеша Дмитриевтыын-Сиэн Чолбодуктуун, Баһылай Тарбыыкынныын о.д.а. кэлин биллэр суруйааччылары, тыл үөрэхтээхтэрин кытары сууйбуттар. Онон кэлин, тыл үөрэхтээх улахан аксакаллар сууйаннар суруйар эйгэҕэ чугаһаатаҕым диэн, испэр күлэ-үөрэ саныыбын.
Ийэбит барахсан ыарахан олоҕу билбит буолан сүрдээх аһыныгас эрээри, санаата олус күүстээх. Хайаан даҕаны эппитин толорон, толотторон баран тэйэр. Биһигини кыра эрдэхпититтэн алыс атаахтаппакка дьиэ ис-тас үлэтигэр үөрэппитэ-такайбыта, оҕолор тус-туһунан эбээһинэспитин булгуччу толорорбут. Оскуолаҕа үөрэнэ сылдьан балтыларын, тастыҥ бырааттарын, убайдарын көмүскэһэн уолаттары суумкатынан түҥнэри дайбаталаан түһэрэрин иһин Майаҕатта диэн хос ааттыы сылдьыбыттар. Хата ол кытаанах характера бэриллэн мин, уолаттарым, сиэним спорка син ситиһиилээхпит дуу дии саныыбын ээ.
Аны киэһэ оһох иннигэр олорон аан дойду алыптаах остуоруйаларын хаһан кэпсиирин кэтэһэн да биэрэрбит. Онно бастаан кинигэттэн нууччалыы доргуччу ааҕан баран, биирдэ сахалыы тылбаастыыра. Итинник ньыманан биһиги остуоруйаны истэрбитин таһынан, нууччалыы түргэнник билэрбитигэр көмөлөспүт эбит. Күн сиригэр саамай чугас киһибит онтон да үгүс үөрүйэхтэргэ үөрэппитэ элбэх бөҕө буоллаҕа. Онон махталбыт муҥура суох!
Күн күбэй Ийэбитин, бу бэйэҥ курдук айылҕа ситэн-силигилээн, чэчирии үүнэр маанылаах күннэрин курдук үтүө санаа кынаттанан, Үрүҥ тунах ыһыахтартан күүс ылан, өссө да уһун үйэлэн диэн алгыс бастыҥын аныыбыт!
Александр ПОСТНИКОВ – Сындыыс.