Ааспыт нэдиэлэҕэ, ахсынньы 24 күнүгэр, үтүө үгэскэ кубулуйбут Ил Дархан харыйата Марфа уонна Сергей Расторгуевтар ааттарынан Саха Өрөспүүбүлүкэтин судаарыстыбаннай циркатыгар күүтүүлээх, дьэрэкээн, алыптаах «Ил Дархан Харыйата-2023», «Туундара күнэ» цирковой остуоруйанан саҕаланна. Манна артыыстар дьиэ кэргэн түмсүүтүн, оҕолор төрөппүттэрин кытары сыһыаннарын, хорсун-хоодуот майгыны толору арыйдылар.
Барыта өрөспүүбүлүкэ улуустарыттан 700 саамай көхтөөх, кыһамньылаах оҕолор муһуннулар. Кинилэр туйгун үөрэнээччилэр, бүтүн Арассыыйатааҕы олимпиадалар, научнай-практическай кэмпириэнсийэлэр кыайыылаахтара, бастыҥ спортсменнар.
Өрөспүүбүлүкэбит Ил Дархана Айсен Сергеевич Николаев бастыҥ үөрэнээччилэри эҕэрдэлээтэ. Кини кэлэн иһэр 2024 сыл Саха Сиригэр Оҕо саас сылынан биллэриллибитин эттэ. Эһиил саҥа оскуолалар, успуорт комплекстара, култуура дьиэлэрэ тутуллуохтара, оҕолор харысхаллаахтарын туоһулуохтара, диэтэ.
Таатта улууһуттан 21 бастыҥ үөрэнээччи кыттыыны ылан кэллилэр. Кинилэр истэригэр үөрэх туйгуннара, активистар, спортсменнар бааллар. Оҕолор «Мы-будущее России» диэн гражданскай форумҥа, араас маастар кылаастарга, ыллаан-туойан, дуоһуйа сынньанан, элбэх доҕоттордонон кэллилэр. Ил Дархан 2024 сылы Оҕо саас сылынан биллэрбитин үөрэ-астына иһиттилэр, махтаннылар уонна кыһамньылаахтык үөрэнэллэрин, элбэх ситиһиилэниэхтэрин эттилэр.
Сыл бастыҥ үөрэнээччилэригэр, Ил Дархан 25 000 солк. кээмэйдээх биирдэ төлөнөр истипиэндьийэ анаата.
Елена Слепцова.