Билигин Хадаайы музейа турар сиригэр тыа быыһынан ийэм олорбут Хатырыктааҕар тахсаҕын. Аҕам манна этюд суруйара. Ийэм Мэхээлэ Ключинскай диэн поляктан төрүттээх. Ол Ключинскай тыа хаһаайыстыбатыгар өҥөтүн иһин мэтээллээҕэ.
Аҕам үбүлүөйдээх сылыгар Дьокуускайга норуоттар икки ардыларынааҕы конференция буолбута. Конференция уурааҕар И.В. Поповка Мэҥэ өйдөбүнньүк оҥорорго ылыммыттара. Кэргэним Люция Саввична ол уураах олоххо киирэригэр сүүрэркөтөр. Бүддьүөттэн үбүлүүргэ 6 сыллаах былааҥҥа киллэриэхпит диэбиттэрэ.
Биһиги дьоммут дьиэлэригэр чааһынай музейдаах этилэр. Суорун Омоллоон ымсыырар этим диэн эппитэ. Мин өйдүүрбүнэн ырбаахы баара, обручтаах, элбэх таҥас барбыт буолуохтаах. Коричневай дьүһүннээх сон баара, быысапка, оҕуруо киэргэтиилээҕэ, оҕуруота граненай, уһун синньигэс, ыас хара этилэр.
Димитриан Попов бэйэтэ иконописец Моравскайы ыҥыртарбыт. Моравскай иконалары сахалыы оҥорор эбит. Моравскай Дьүлэй чочуобунатын уруһуйдаабыт. Сибэкки, дьаабылака ойуулаах ыскаап аллараа өттүн аҕам оҥорбут. Бүтэйдээх таҥаратын дьиэтигэр дьонум олоро сылдьыбыттар. Бытыктаах нуучча киһитэ уруһуйдаабыта диэн кэпсииллэр. Көрөрүм буоллар быһаарыам этэ. Адьас былыргы, аҕам реставрациялаабыта буолуо дии саныыбын. Аҕам «Якутская красавица» хартыыната сүппүтэ. Элбэх үлэтэ суох буолбута.
Иван Васильевич 60-ча киһи уҥуоҕун хаһыспытым диэн сурук хаалларбыт. Кини Константинов археолог өлбүтүн кэннэ тохтообут этэ. Константинов аҕаҥ хаспыт уҥуоҕар түбэспитим, хаһыллыбатах курдук көстөр диэбит. Иван Васильевич уҥуоҕун үрдүгэр Еля кыыһа Надя диэн кыыс сытар. Дьонум бука бары сылаастык ахтылла туруохтара.
Иван Попов тылыттан ахтыыны суруйда Изабелла Жерготова, Чөркөөх музейын сотруднига.
От ыйа, 2005 сыл. Ытык Күөл.