Дьокуускай куораттан аһаҕас халлаан анныгар турар Д.К.Сивцев-Суорун Омоллоон аатынан Чөркөөхтөөҕү политсыылка музейыгар культурологическай экспедиция үлэлээтэ.
Экспедиция салайааччытынан Санкт-Петербургтан сылдьар, билигин АГИКИ-га культурология уонна Арктика норуотун культуратын нэһилиэстибэтин кафедратын доктора, профессор Т.Ф.Ляпкина, маны сэргэ «М.К. Аммосов аатынан Хотугулуу-Илиҥҥи бэдэрээлинэй үнүбэрситиэт» Арассыыйа Бэдэрээссийэтин Хотугулуу-Илиҥҥи норуоттарын тылларын уонна култуураларын үнүстүтүүтүн культурология кафедратын доцена С.С.Протопопов уо.д.а. кэллилэр.
Экспедиция сүрүн сыалынан-соругунан музейга хараллан турар экспонаттары үөрэтии буолар. Манна культурологическай экспертизаны ыытыы, чинчийии, сыаннаһын үөрэтэн көрүү киирэр.
Лекция ыытаар профессор Т.Ф.Ляпкина
Бастакы күн Татьяна Ляпкина икки музей үлэһиттэригэр «Культурологическай экспертиза» диэн лекцияны аахта. Татьяна Федоровна музей обьектарыгар тохтоон, XIX-үйэтээҕи архитектурнай тутуулары сэҥээрбитин, аан дойдуга аналога суох тутуулар буолалларын бэлиэтээтэ. Тутуулары харыстааһыҥҥа үлэ уталыйбакка барыахтааҕын, билигин симэлийэр куттал баарын эттэ. Салгыы Татьяна Федоровна: «Экспертизаны архитектурнай тутуулар ымпыктарын-чымпыктарын билэр киһи ыытыан наада. Мин бэйэм өттүбүттэн общественнай бачыым быһыытынан биир обьекка экспертиза оҥоруохпун сөп», — диэтэ. Иккис күн ыалдьыттар Былатыан Ойуунускай киинэ түспүт сирэм күөх алааһыгар тахсан күүс-уох, алгыс ыллылар. Манна Чөркөөхтөөҕү политсыылка музейын сэбиэдиссэйэ Михаил Протодьяконов көрсөн экскурсия ыытан, туох үлэ барыахтааҕын көрдөрдө, сиһилии кэпсээтэ. Экспедиция үлэтигэр музейтан Изабелла Жерготова, Анна Борисова, Сардаана Аввакумова, Оксана Жерготова киирэн үлэлэстилэр. Салгыы үлэ саҥа торумун тутуһан, ыллыктаах кэпсэтии олоххо киириэ диэн эрэнэбит.
С.Халгаева.
Хаартыскаҕа көрсүһүү түгэннэриттэн