Киирии аартык бырайыагын оҥорбут Петр Сергеевич Доргуев туһунан ааҕааччыларбыт билиэхтэрин баҕарар буолуохтаахтар. Телефонунан сибээстэһэн бэйэтин билиһиннэрэригэр, арт-эбийиэктэр ис хоһооннорун туһунан кэпсииригэр
— Бэйэм Уолбаҕа төрөөбүтүм. Аҕам уус, худуоһунньук Сергей Петрович Доргуев. Ийэм Валентина Гаврильевна уһун дистанцияҕа сүүрүүгэ Европа, Россия, Саха сирин чемпиона. Ытык Күөл 2 нүөмэрдээх оскуолатын бүтэрбитим. Намнааҕы педагогическай колледжка, онтон Уһук Илиҥҥи Судаарыстыбаннай Университекка үөрэнэн изо, черчение учууталын идэтин ылбытым. Билигин Тааттатааҕы баһаары утары охсуһар сулууспаҕа үлэлиибин. Ону таһынан дьиэ-кэргэмминээн айарбытын тутарбын сөбүлүүбүт.
Киирии аартык бэлиэ символларын, тутууларын дизайнын конкурсугар кыттыбытым. Комиссия мин бырайыакпын талбыта.
Кыраныысса — кинигэ обложката, киинэ киирии аатын курдук, хайа дойдуга кэлбиккин, олохтоох дьон тугу өрө туталларын көрдөрөр, арыйар бэлиэ тутуулардаах буолуохтаах дии саныыбын. Ол курдук саха да киһитэ, тас дойдуттан кэлбит омук да киһитэ Саха Сирин биир бэлиэ сиригэр кэллибит диэн турукка киириэхтээхтэр диэн санааттан толкуйдаан онорбутум. Ол курдук 14 сэргэ — ураһа дулҕата, ортотугар холумтан, итэҕэлбитин, култуурабытын арыйар бэлиэ.
Оттон “Алгыс” интерактивнай инсталляция аныгы кэми бэйэбит былыргыттан кэлбит итэҕэлбитин кытта ситимниир бэлиэ. Уонна ыраах айаҥҥа турунар киһи санаатыгар эрэл киллэринэр, алгыс ылар миэстэтэ.
Бастакы бырайыагынан үрдүк кургааҥҥа муус маҥан 8, киһи илиитинэн туппатах аарыма Айыы сэргэлэрэ туруохтаах этилэр, тула өттө ыраас уһун күөх от эрэ. Ааһааччы айанньыт ким да этиитэ, күһэйиитэ суох тус бэйэтэ итэҕэл дойдутугар, сүрэҕэр кэллим диэн санаа үөскүүр, сөҕөр-махтайар тутуута буолуохтаах этэ. Онтон сүбэлэһэн баран, харчы кырыымчык диэн кыччатан, намыратан сиргэ түһэрэн, статуһа уларыйда дии саныыбын.
Ол эрээри бырайыак дьиҥ олоххо киириитигэр уларыйыан сөп буоллаҕа дии, билиҥҥи тутуу мин санаабар кыратык да суолтатын сүтэрбэккэ, биир сомоҕо өйдөбүлүн көрдөрөрө эмиэ үчүгэй. Судургу быһыылаахтар эрээри көрбүт киһи уобарастаан, суолтатын дириҥэтэн ылынарыгар кыах биэрэр.
Кэпсэттэ Сарыал Кыыма