Олоҥхо дойдутугар — ытык-мааны Тааттабытыгар «Манчаары оонньуулара» үрдүк таһымнаахтык ыытылларыгар улуус дьоно-сэргэтэ бэлэмнэнэ, үлэлии-хамсыы сылдьар. Ытык Күөлгэ стадион, спортивнай эбийиэктэр тутууларын бэлэмэ 85%-ҥа тэҥнэһэр.
Ол курдук ыам ыйын 11 күнүгэр Ытык Күөлгэ киирии аартык саҥа бэлиэтэ (урукку ГАИ поһун оннугар) дьэндэйэн турда. Бу аншлаг дизайн бырайыагын Иван Иванович Кычкин салайааччылаах «Градо» архитектурнай бюро оҥордо. Оттон бырайыак конструктивнай быһаарыытын Сергей Сергеевич Барахов салайааччылаах «Арка» архитектурнай бюро ылынна.
Кулун тутар 26 күнүгэр Таатта нэһилиэгин дьаһалтата «Сириус» диэн тупсаҕай көстүүлэри, талба-мааны тутуулары оҥорор Сергей Иванович Софронов тэрилтэтин кытта 2 449 000,00 солк. хантыраак баттаһан, саҥа киирии аартык үлэтэ саҕаламмыта. Бу аншлаг 710 уст. кинетическэй фасад технологиянан тутулунна. Конструкция 3 устуука винтовой сваяларга турар. Киирии «Ытык Күөл» сурук светодиоднай лентанан тардыллан 97 см үрдүктээх, оттон шириибэ нэһилиэкпит бэйэтин дизайн кодугар сөп түбэһэр. Бырайыак быһыытынан Аншлаг кээмэйин үрдүгэ уонна устата 6-лыы миэтэрэ. Бу уоттаах-күөстээх киһи сүргэтин көтөҕөр кэрэ көстүүлээх тутуу буолла.
Бу тутууга төгүрүк иһинэн ааһар сурааһын Ытык Күөл күөлүн иһинэн Таатта үрэх устан ааһарын көрдөрөр суолталаах. Ытык Күөл — нэһилиэк тэбэр сүрэҕэ, киниттэн улууспут киинин устуоруйата саҕаламмыта. Маҥнайгы олохтоохтор бу эбэ кытылыгар тоҕуоруһан, торҕо буруо унаарытан, олохсуйан барбыттара. Ытык Күөл урут Үүт Күөл, Үрүҥ Күөл диэн ааттана сылдьыбыта биллэр. Логотипка нэһилиэк устуоруйата, айылҕа кэрэ көстүүтэ, олохтоохтор Ытык Күөллэригэр, Таатта үрэхтэригэр сүгүрүйүүлэрэ уонна тапталлара түмүллэн ойууланар.
Үс сэргэ кэккэлэһэ турбута, бу көлүөнэлэр сибээстэрэ, түмсүү символа. Үс чыыһыла сахаларга ытык суолталаах, онон үс сэргэ – быстыспат ситим, былыргы, аныгы уонна кэлэр кэм алтыһыыта, үрдүккэ сырдыкка талаһыыта.
Кинетическай фасад тыалга хамсаан тэлибириир пластиналара дьэс алтан өҥө эмиэ ураты суолталаах. Бу түҥ былыргы өҥ өбүгэлэрбит төрүт дьарыктарын көрдөрөр, тыалга хамсаан уран тыаһы таһааран харысхал буолар аналлаах.
Маннык технологиянан оҥоһуктар Чөркөөххө, Кыйыга уонна Таатта кыраныыссатыгар туруохтара.
Маны таһынан ааспыт нэдиэлэҕэ даачаларга туоруур муостаны көннөрөн, кырааскалаан, уот тардан саҥардыллыбыта нэһилиэк олохтоохторун үөртэ.
Дайаана Миронова.