Аан дойду үрдүнэн муус устар 12 күнэ космонавтика күнүнэн биллэриллибитэ. Бу күн дьикти дьарыктаах Уус Амма нэһилиэгин олохтооҕо, өр сылларга нэһилиэк почтатыгар үлэлээбит, үлэ бэтэрээнэ Октябрина Тистяхова бэйэтин мунньубут коллекциятын куйаар ситим нөҥүө ыытта.
Хас бэлиэ күн кини бэйэтэ мунньубут, коллекциялаабыт малын-салын хаартыскаҕа түһэрэн дьон-сэргэ көрдүн , сэҥээрдин диэн ситим нөҥүө ыытар эбит.
Бу сырыыга бүгүҥҥү күҥҥэ аналлаах космонавтикаҕа сөптөөх значоктары, маркалары ситим нөҥүө ыытан үөртэ.
Кини бу дьарыгын 1971 сыллаахтан саҕалаан, бүгүҥҥэ диэри мунньа, уура-харайа сылдьар. Өссө биир кэрэхсэбиллээҕэ, коллекционер бу дьарыгын кэнчээри ыччаты, оҕолору, сиэннэри угуйар, урукку малы-салы харыстыырга үөрэтэр-такайар, историятын билэргэ-көрөргө уһуйар.
Оҕо сааспытын санатта диэн махтанааччылар элбээбиттэр. Онтон сорохтор бу бэртээхэй коллекция сайда турарыгар баҕардылар.
Елена Слепцова.