Филатов Еремей Еремеевич
(1898 – 1979)
Таатта оройуонун Дьиэбэгэнэ нэһилиэгэр төрөөбүтэ. «Бойобуой» холкуоска хонуу үлэтигэр ыһыыга, окко, бурдукка үлэлээбитэ. Холкуоска от үлэтигэр солбуллубат массыынанан оҕустарааччы. Массыынанан оҕустарыы саҥа олоххо киириитигэр оройуоҥҥа 1941 с. бастакы стахановскай рекорду олохтообута. Чурапчытааҕы холбоһуктаах оройуоннааҕы военкоматын 1942 с. кулун тутар 13 күнүгэр Кыһыл Аармыйаҕа ыҥырыллыбыта. Хотугулуу Арҕаа фроҥҥа 49-с туспа батальонун 17-с ротатыгар сэриилэспитэ. 1943 с. сэтинньи 12 күнүгэр атаҕар бааһыран госпитальга эмтэнэн, үтүөрэн, эмиэ Хотугулуу-Арҕаа фроҥҥа сылдьыбыта. Иккиһин төбөтүгэр 1945 сыл олунньу ыйга бааһыран 1051-с ЭГ (эвакогоспитальга) эмтэнэн, аны II-с Прибалтийскай фроҥҥа сэриилэспитэ. Кыайыы буолан, 1945 с. балаҕан ыйыгар дойдутугар эргиллэн кэлбитэ. Кэлэн сүөһү ферматыгар биригэдьиирдээбитэ, кыһынын холкуос араас үлэлэригэр сылдьыбыта. «Бойобуой», бөдөҥсүйбүт Сталин, Ленин холкуостарга сайынын атынан от оҕустарыыга 1960-с сылга дылы бастыҥ оҕустарааччы, оройуоҥҥа куоталаһыыга хас да сыл кыайыылааҕынан тахсыталаабыта. Кэлин Ленин аатынан холкуоска, «Таатта» сопхуоска кадровай булчутунан сылдьыбыта. Кэргэннэммитэ, оҕолордоох, сиэннэрдээх.
Наҕараадалара: «Хорсунун иһин», «Германияны кыайыы иһин», «ССРС Сэбилэниилээх күүстэринэн 50 сыла», «Аҕа дойду Улуу сэриитин 1941-1945 сс. килбиэннээх үлэтин иһин», Улуу Кыайыы үбүлүөйдээх сылларын мэтээллэрэ. Интернеккэ 2013 с. «Подвиг народа» сайтка личнэй дьыалатыгар «Кыһыл Сулус», «Албан аат III-с степенэ», «Аҕа дойду сэриитин II-с степенэ» орденнар бааллар. Араспаанньата сыыһа суруллан, бу наҕараадалара тыыннааҕар тиксэриллибэтэхтэрэ.
Кыайыы кынаттаах Албан аат — тыыннаах, кинигэттэн ылылынна.