Ахсынньы 25 күнүгэр Мэҥэ Хаҥалас улууһугар Аллараа Бэстээххэ В.В.Местников аатынан култуура киинигэр «Кыайыы туһугар бары бииргэ!» анал байыаннай дьайыы кыттыылаахтарыгар уонна кинилэр дьиэ кэргэннэригэр күүс-көмө, өйөбүл буолар волонтердар илин эҥэрдээҕи форумнара ыытылынна. Дириҥ суолталаах тэрээһиҥҥэ Мэҥэ Хаҥалас, Амма, Чурапчы, Уус-Алдан, Таатта, Томпо улуустарын волонтердарын холбоһуктара, анал байыаннай дьайыы кыттыылаахтарын дьиэ кэргэттэрэ кытыннылар. Форум өрөспүүбүлүкэ бары муннугун хабан Нерюнгри, Ньурба, Нам, Мэҥэ Хаҥалас улуустарыгар, Дьокуускай куоракка кииннэнэн ыытылынна. Тэрээһини СӨ ыччат бэлиитикэтигэр уонна социальнай алтыһыыга министиэристибэтэ, «Патриот» ыччат уонна «Кыайыы туһугар бары бииргэ!» өрөспүүбүлүкэтээҕи хамыыһыйа суһал ыстаабын сүрүннүүр кииннэрэ иилээн-саҕалаан, тэрийэн ыыттылар. Тэрээһин чэрчитинэн волонтердар үлэлэрин уопутун үллэстэр түһүлгэҕэ алтыстылар, түмсүүлэрин хамсааһынын бар дьоҥҥо сырдаттылар, анал байыаннай дьайыы кыттыылаахтарыгар тикпит таҥастарын, туттар тэриллэри быыстапкалаатылар.
Күн устата суһал ыстаап сүрүннүүр киинин юристара нэһилиэнньэ анал байыаннай дьайыыга сыһыаннаах ыйытыыларыгар хоруйдаатылар, сокуон иитинэн сүбэ-ама биэрдилэр. Анал байыаннай дьайыыга дойдубут чиэһин көмүскүү сылдьар байыастар волонтердар үлэлэрин суолтатын бэлиэтиир, махтал тылларын аныыр куоластарын устуута аудио-истиэндэҕэ холбонон мустубут бар дьону долгутта.
Тэрээһиҥҥэ СӨ ыччат бэлиитикэтигэр уонна социальнай алтыһыыга миниистирэ Петр Шамаев, «Кыайыы туһугар бары бииргэ!» өрөспүүбүлүкэтээҕи хамыыһыйа суһал ыстаабын сүрүннүүр киинин салайааччыта, Донбасска Көмө уонна өйөбүл хотугулуу-илиҥҥи пуондатын дириэктэрэ Георгий Куркутов, СӨ саллааттарын уонна мотуруостарын төрөппүттэрин кэмитиэтин бэрэссэдээтэлэ Мария Емельянова кыттыыны ыллылар.
Улууспутугар күн бүгүн ыытылла турар үлэни-хамнаһы улуус дьаһалтатын анал байыаннай дьайыыга специалиһа ТУЯРА ОРЛОВА сиһилии сырдатта:
Ааһан эрэр Арассыыйаҕа Аҕа дойдуну көмүскээччилэр, республикаҕа Ийэ дойдуну көмүскээччилэр, улуспутугар Кыайыы сылыгар — сыл устата үгүс үлэ барда. Ол курдук, буойуттарбытыгар көмөнү хомуйууга тэрээһиннэр, байыастарбытыгар уонна кинилэр дьиэ кэргэттэригэр анаан төгүрүк остуоллар, акциялар, дьиэ-уот ис-тас үлэтигэр, муус, мас, чох тиэйиитигэр көмөлөр ыытылыннылар.
Сэтинньи ыйга ыытыллыбыт “Кыайыы туһугар — бары бииргэ” акцияҕа бары тэрилтэлэр, нэһилиэктэр, биирдиилэн дьон күүстэринэн 3 мөл кэриҥэ харчы хомулунна.
Бу күннэргэ хомуллубут гуманитарнай көмө биир дойдулаахтарбыт Николай, Иван Мочкиннар көмөлөрүнэн тиийиэхтээх сиригэр тиэрдилиннэ. Күн бүгүн Таатта улууһуттан улуус баһылыгын социальнай боппуруостарга солбуйааччы Никифор Никифорович Жерготов, Алдан нэһилиэгин баһылыга Егор Николаевич Постников миэстэтигэр тиийэн, уолаттары кытта көрсөн, улуус олохтоохторуттан хомуллубут дойдуларын аһын, дьиэ кэргэттэриттэн кэһиилэрин түҥэтэ сылдьаллар.
Уопсайа барыта холбоон 2585 кг тоҥ ас хомулунна:
- Ынах, убаһа этэ — 1200 кг
- Отон, барыанньа 320 л
- Собо — 38 куул (ортотунан 600 кг)
- Ынах арыыта 130 кг кэриҥэ
- Ис үөрэтэ — 120 кг кэриҥэ
- Ыыһаммыт сылгы этэ — 165 кг
- Ыһаарыламмыт собо — 50-70 кг
Гуманитарнай көмөнү хомуйууга улууспут нэһилиэктэрэ, тэрилтэлэрэ, оскуолалара, уһуйааннара, биирдиилээн үтүө санаалаах дьоммут төһүү күүс буоллулар. Кинилэр күүстээх өйөбүллэринэн, көмөөлрүнэн 1000-тан тахса ахсааннаах танас-сап, мал-сал хомулунна. Нэһилиэктэринэн, тэрилтэлэринэн харысхал набордара, буруолатар от хомулунна. Таатта нэһилиэгин оскуолаларыгар, уһуйааннарыгар барыанньалар кутулуннулар, собо ыһаарыланна. Хатас, Сылаҥ нэһилиэктэрин агрооскуолаларыгар үлэһэн, собо миинин оҥотторон Ростовка баар госпитальга ыыттыбыт.
Саҥа дьылынан оҕолорго анаан “Үтүө санаа харыйата” акция (АБДь кыттыылаахтарын дьиэ кэргэттэригэр бэлэх туттарыы) ыытылла турар, манна Таатта улууһун бары тэрилтэлэрэ көхтөөх кыттыыны ыла сылдьаллар.
Соторутааҕыта Аллараа буолан ааспыт «Кыайыы туһугар бары бииргэ!» анал байыаннай дьайыы кыттыылаахтарыгар уонна кинилэр дьиэ кэргэннэригэр күүс-көмө, өйөбүл буолар волонтердар илин эҥэрдээҕи форумнарыгар Таатта улууһуттан уопсайа 11 буолан баран кыттан кэллибит. Улууспут баһылыга Айаал Семенович Бурцевка республика салалтатын аатыттан махтал сурук, “Восток” войскаларын группировкатын командующайыттан, генерал полковник А.Иванаевтан махтал сурук туттарылынна.
Анал байыаннай дьайыыга баҕа өттүнэн көмөлөһөр көхтөөх волонтердар СӨ ыччат бэлиитикэтигэр уонна социальнай алтыһыыга министиэристибэтин, өрөспүүбүлүкэтээҕи хамыыһыйа суһал ыстаабын сүрүннүүр киинин, Донбасска Көмө уонна өйөбүл хотугулуу-илиҥҥи пуондатын, «Кыайыы туһугар бары бииргэ!» пуорум тэрийэр кэмитиэтин грамотатынан, махтал суругунан наҕараадаланнылар. Бу наҕараадаҕа тиксэргэ бары кыттыспыт, үлэлэспит дьоммутугар барҕа махталбытын биллэрэбит:
- Үтүө санаалаах волонтердарбытыгар:
- Улуус Мунньаҕын депутаттарыгар (бэрэссэдээтэл П.П.Максимов)
- Таатта нэһилэгин дьаһалтатыгар (баһылык Е.И. Павлов)
- Улуустааҕы киин балыыһаҕа (кылаабынай быраас С.В. Кононова)
- Улуустааҕы үөрэх управлениетыгар (начальник И.И. Дягилев)
- СӨ «Тааттатааҕы лесничество» ГКУ (директор Уранаев П.А.)
- ОГПС РС(Я) №32 (начальник Д.П.Рахлеев Д.П., солбуйааччыта И.Ф.Рахлеев)
- «Техресурс» МАУ (директор И.И.Бурмистров)
- МАУ «ТОУ» (директор А.А.Постников)
- МБУ ЦКиИРС (директор А.И.Тарасов)
- “Харыстаана” түмсүү (салайааччы А.Е.Никифорова)
- “Сатабыл” оҕо айымньытын дьиэтигэр (директор Сырдык Ай, Алексеева М.Д.)
- «Монтажник» ПК (директор А.М.Ханин)
- Дьокуускайдааҕы медколледж филиалын студеннарыгар (салайааччы Н.Е.Винокурова)
- Гуманитарнай көмөнү хомуйууга, байыастарбытыгар күүс көмө буолар улууспут общественнай түмсүүлэригэр, түөлбэ салайааччыларыгар.
- Куруук ыытыллар тэрээһиннэргэ көмөлөһөр спонсордарбытыгар:
- “Төлөн” АО (директор П.Д. Рахлеев)
- “Тааттаавтодор” АО (директор И.И.Бочонин)
- «Баай-Ас» ТПК (директор С.Н.Андросов)
- «Таатта» ТПК (директор А.Д. Алексеев)
- «Аллан» маҕаһыын (Н.Г.Винокуров)
- «Байдам» маҕаһыын (В.Л.Андросов)
- «Эконом» маҕаһыын (А.Н.Данилова)
- «Абсолют» мааһыын (А.А.Элякова)
- Улууспут бары нэһилиэктэрин баһылыктарыгар, олохтоохторугар.
Кэлэн иһэр саргылаах Саҥа дьылынан итиитик-истиҥник эҕэрдэлиибит! Үтүө санааҕыт сүүс үтүөнэнэн үрүлүйдүн, амарах санааҕыт аргыстастын, кэлэр сылга дьиэ кэргэҥҥитигэр дьол-соргу тосхойдун.
Галина ПОЛУСКИНА.