Бүгүн Таатта улууһун Ытык-Күөллээҕи “Күн туллуктара” уһуйааҥҥа “Деталька – 2025” Аан дойдутааҕы робототехника уонна цифровой технологиялар күрэхтэригэр ситиһиилээхтик кыттан кэлбит иитиллээччилэрин чиэстээтилэр.
Бу күрэх ыам ыйын 2-3 күннэригэр Санкт-Петербург куоракка ыытыллыбыта. Күрэххэ бүтүн Россия 14 регионуттан 300-тэн тахса оҕо күөн көрсүбүттэрэ. Саха сириттэн 16 оҕо тэрилтэтиттэн 37 оҕо кыттыбыттара. “Күн туллуктара” уһуйаантан творческай категорияҕа икки хамаанда кытынна: 4-5 саастаахтарга “Звездочки” хамаанда – Тимофеева Василина, Собакина Ева, проектара “Мини-прачечная “Фея”; 6-7 саастаахтарга “Туллук Стар” хамаанда – Дедюкин Денис, Товаров Максим, Протодьяконов Сандал, проектара “Мини-завод “Ягодка”. Товаров Максим “Автоматическая доставка” биирдиилээн күрэххэ кытынна. Салайааччылара – “Күн туллуктара” педагога Винокурова Нария Федоровна.
Оҕолорбут улуустааҕы, өрөспүүбүлүкэтээҕи этаптарга ситиһиилээхтик кыттан, “Деталька – 2025” Аан дойдутааҕы робототехника уонна цифровой технологиялар күрэх тэрийээччилэриттэн ыҥырыы сурук тутан, хас да ый тохтоло суох бэлэмнэнэн, Санкт-Петербург куоракка проектарын дьүүллүүр сүбэ иннигэр көмүскээн, “Звездочки” хамаанда “Лучшее инженерное решение” номинацияҕа 2 миэстэни ыларга ситистэ, “Туллук Стар” хамаанда үлэтэ биһирэбил суругун туттулар.
“Күн туллуктара” уһуйаан 2016 сылтан “Деталька” Аан дойдутааҕы робототехника уонна цифровой технологиялар күрэххэ сылын аайы Россия араас куораттарыгар, тас дойдуларга иитиллээччилэрин робототехникаҕа бэлэмнээн кытыннарара биһирэбиллээх. Оҕолорго, төрөппүттэргэ, тренерга Нария Федоровна Винокуроваҕа, уһуйаан салайааччытыгар Иннокентий Николаевич Татариновка өссө төгүл истиҥ эҕэрдэ уонна махтал тылларын тиэрдэбит. Ону таһынан, кырачаан кыттааччыларга күүс-көмө буолбут ИП “Монтажник” салайааччытыгар А.М. Ханиҥҥа, “Баай Ас” СПК бэрэссэдээтэлигэр С.Н. Андросовка, ИП “Потапов К. Т.” «Телемир» маҕаһыын салайааччытыгар К. Т. Потаповка барҕа махталбытын тиэрдэбит.
Прасковья Иовлева, «Күн туллуктара» уһуйаан сүрүн иитээччитэ