Олунньу 27 күнүгэр улуус оскуолаҕа киириэн иннинээҕи саастаах оҕолорун икки ардыларыгар «Кыымчаан» байыаннай- патриотическай күрэх түмүктэннэ. Бу күрэҕи сылын аайы Тыараһа оскуолатын уһуйаана, ветеран үлэһиттэрэ уонна кэлэктиибэ спонсордаан тэрийэр.
Улуус киинин 5 уһуйаана — «Кэнчээри», «Сулусчаан», «Чуораанчык» оҕону сайыннарар кииннэр, «Березка», «Күн туллуктара» оҕо саадтара, Тыараһа уонна Дьохсоҕон орто оскуолатын иитиллээччилэрэ кытыннылар.
Дьүүллүүр сүбэҕэ улуустааҕы үөрэх салалтатын сүрүн специалиһа Иванова Л. В., Тыараһа детсадыттан сүрүн иитээччи Чехордуна Н.В. уонна 2025 с. Арассыыйа аармыйатыгар сулууспалаан кэлбит Жерготов Данил киирэннэр сыаналаатылар.
Күрэх икки түһүмэҕинэн: ырыалаах хаамыы уонна моһоллору туоруур эстафета ыытылынна.
Оҕолор бары кыһаллан, бэлэмнэнэн кэлбиттэр. Сыл аайы оҕолор байыаннайдыы хаамаллара, хамаандалары толороллоро тупсан иһэрэ салайааччылар таһымнара үрдээн иһэрин көрдөрөр.
Тыҥааһыннаах икки түһүмэх түмүгүнэн 1 миэстэни «Чуораанчык», 2-с миэстэни Тыараһа орто оскуолата, 3-с миэстэни «Сулусчаан» хамаандалара ыллылар. Бастыҥ хамандыырынан «Кэнчээри» ОСК киин иитиллээччитэ Петров Захар ааттанна.
«Березка» хамаандата «Кыайыыга дьулуурун иһин», Дьохсоҕон орто оскуолатын хамаандата «Түмсүүлээх хамаанда» , «Кэнчээри» ОСК «Бастыҥ ырыа», «Күн туллуктара» «Бастыҥ байыаннай таҥас» анал ааттары ыллылар.
Кыайыылаахтар кубогынан, мэтээллэринэн, грамоталарынан наҕараадаланнылар.
Күрэх тэрээһинигэр спортивнай сааланы уларсыбыт улуустааҕы оҕо спортивнай оскуолатын директорыгар Егор Егорович Ноеноховка махталбытын тиэрдэбит.
Күрэххэ кыттыбыт детсад салайааччыларыгар, физруктарыгар, төрөппүттэригэр бары үчүгэйи, ситиһиилээх үлэни баҕарабыт.
Нюрианна ЧЕХОРДУНА.