Бүгүн күрэс төрүт көрүҥнэригэр XXII “Манчаары оонньууларын” уотун эстафетатын Таатта улууһугар көрсүү, Таатта-Чурапчы кыраныыссатын саҥардыы кэнниттэн үөрүүлээх аһыллыыта буолла.
Урааҥхай удьуора уутуйан үөскээбит Мэҥэ Хаҥалас улууһун Догдоҥо нэһилиэгин, күөх ньуурдаах Арыылаах алааһыттан номоххо киирбит саха национальнай дьоруойа Баһылай Манчаары киинэ түспүт сириттэн бэс ыйын 20 күнүгэр күрэс төрүт көрүҥнэригэр XXII “Манчаары оонньууларын” уота уматыллан Дьокуускай куорат, Мэҥэ Хаҥалас, Чурапчы улуустарын устун айаннаан бүгүн от ыйын 4 күнүгэр Таатта сиригэр киирдэ!
Уоту арыаллыыр бөлөх салайааччыта — Дмитрий Николаевич Горохов — Саха Өрөспүүбүлүкэтин физическай култуураҕа уонна спортка үтүөлээх үлэһитэ, Саха сиригэр ыытыллар Саха сирин норуоттарын спортивнай, “Азия оҕолоро” норуоттар икки ардыларынааҕы оонньууларын, «Манчаары оонньууларын» уоттарын арыаллыыр эстафеталарын, Улуу Кыайыыга аналлаах патриотический сүүрүүлэр салайааччылара уонна көҕүлээччитэ, экстремал сүүрүүктэр салайааччылара, Саха Өрөспүүбүлүкэтин чөл олох иһин хамсааһынын лидера;
Екатерина Константиновна Драгунова— чэпчэки атлетикаҕа Саха Өрөспүүбүлүкэтин спордун маастара, Саха Өрөспүүбүлүкэтин 3000 уонна 5000 м. экс-рекордсмена;
Владимир Иванович Тордуянов — чэпчэки атлетикаҕа Саха Өрөспүүбүлүкэтин физкультураҕа уонна спортка туйгуна, Өрөспүүбүлүкэ, улуус элбэх төгүллээх чемпиона, призера, “Азия оҕолоро” төрдүс норуоттар икки ардыларынааҕы оонньууларын уотун эстафетатын кыттыылааҕа;
Владимир Владимирович Находкин — марафоҥҥа Саха Өрөспүүбүлүкэтин спордун маастара, ветераннарга Өрөспүүбүлүкэ хас да төгүллээх чемпиона, призера, Саха сиригэр ыытыллар Саха сирин норуоттарын спортивнай , “Азия оҕолоро” норуоттар икки ардыларынааҕы оонньууларын уотун эстафетатын кыттыылааҕа, чэпчэки атлетикаҕа элбэх араас хабааннаах сүүрүүлэр тэрийээччитэ, Саха Өрөспүүбүлүкэтин бочуоттаах землеустроителэ;
Валентина Гаврильевна Доргуева — Саха Өрөспүүбүлүкэтин үлэ уонна спорт ветерана, марафоҥҥа Саха Өрөспүүбүлүкэтин, Россия уонна Европа чемпиона, “Полюс Холода-Оймякон” экстремальнай марафон кыттыылааҕа, Аан Дойдутааҕы сэттэ күннээх күрэхтэһии чемпионката, уһун сүүрүүгэ Россия спордун маастарыгар кандидат, Саха сиригэр ыытыллар Саха сирин норуоттарын спортивнай , “Азия оҕолоро” норуоттар икки ардыларынааҕы оонньууларын уотун эстафетатын кыттыылааҕа, Саха Өрөспүүбүлүкэтин култууратын туйгунa.
Уоту арыаллыыр бөлөҕү сахалыы сиэринэн унаар түптэ күөдьүтэн, арчылаан көрүстүлэр “Күн чөмчүүктэр”, үрдүк мэҥэ халлаан үрүҥ тыыннаах тоҕус үтүө айыыларыгар, Аан Ийэ дойду аламаҕай иччилэригэр айах тутан алгыс анаата Саха Өрөспүүбүлүкэтин Ыччат политикатын туйгуна, Саха Өрөспүүбүлүкэтин үтүөлээх оһуохай этээччитэ, олоҥхону, норуот ырыатын толорооччу, алгысчыт Иван Федотович Иванов. Алгыс тыла дуорайан үөһээ көтүүтэ көтөр арааһа элиэтии көттө, аартык иччилэригэр үгүрү-сүгүрү буолуута үрүҥ хоптолор үрдүбүтүнэн кылбаҥныы кыырайдылар!
Алгыс кэннэ Таатта улууһун аҕа баһылыга Айаал Семенович Бурцев, Саха Өрөспүүбүлүкэтин физическэй култуура уонна спорт миниистирэ Леонид Николаевич Спиридонов, Чурапчы улууһун депутаттарын сэбиэтин бэрэссэдээтэлэ Яков Павлович Оконешников эҕэрдэ тыл эттилэр.
Бүгүҥҥү бэлиэ күн саамай чыпчаала, XXII “Манчаары оонньууларын” уотун туттарыы үөрүүлээх түгэнэ үүннэ. Ол курдук Чурапчы улууһун депутаттарын сэбиэтин бэрэссэдээтэлэ Я.П. Оконешников Таатта улууһун баһылыгар А.С. Бурцевка күөх төлөннөөх факелы уруйдаан-айхаллаан туттарда!
Ол кэннэ “Манчаары оонньууларын” бастакы өрөгөй ырыатын Тааттабыт талааннаах ыччаттара — Дьулустаан Толстяков тылыгар, Ариана Решетникова дьүрүлүгэр “Өрөгөй” эр дьон ырыа ансаамбыла ыллаан кэлбит дьону эҕэрдэлээтилэр!
Бу курдук икки бүк үөрүүлээх бэлиэ тэрээһин түмүктэнэн “Манчаары оонньууларын” уота салгыы Тыараһа нэһилиэгэр айаннаата.
Сарыал Кыыма