Бу күннэргэ Саха өрөспүүбүлүкэтигэр судаарыстыбаннай уонна муниципальнай өҥөлөрү оҥорор элбэх хайысхалаах киин Тааттатааҕы салаата тэриллибитэ 10 сылын бэлиэтээтэ. 2014 с. ахсынньы 24 күнүгэр П.А.Ойуунускай аатынан народнай театр уораҕайыгар бастаан 3 үлэһиттээх арыллан үлэтин саҕалаабыта. Онтон үһүс сылыгар номнуо икки этээстээх саҥа таас дьиэҕэ киирэн, күн бүгүн элбэх киириилээх-тахсыылаах “Мин докумуоннарым” офис кылаабынай специалист Голикова Юлия Брониславовна салайааччылаах, уопуттаах үрдүк квалификациялаах специалистар Никитина Евдокия Семеновна, Башарина Валентина Алексеевна, Мосоркина Марина Геннадиевна, эдэр кэскиллээх үлэһит Егорова Татьяна Владимировна, билигин оҕотугар олорор Охлопкова Елена Михайловна диэн эйэҕэс-сайаҕас үлэһиттэрдээх тигинэччи үлэлии олорор. Таатта олохтоохторо араас кыһалҕалаахтар күннэтэ офиска кэлэн 4 түннүгүнэн кыһалҕаларын быһаартараллар. 10 сыл тухары 78080 туһулаан этиилээхтэри иһиттэ уонна 42391 сайабылыанньаны ылла. Манна ордук дьиэ-уот, уһаайба регистрациялааһына, оҕо пособиетын туһунан, паспорт, прописка боппуруостара, госуслуга порталынан туһаныы, сайабылыанньаны ыытыы, ИП регистрацията, уларытыылары киллэрии курдук тыын боппуруостардаах кэлэллэр. Бу киин барыта 210, ол иһигэр физическэй сирэйдэргэ 129, юридическай сирэйдэргэ 81 судаарыстыбаннай уонна муниципальнай өҥөнү оҥорор. Араас кыһалҕаҕа кыпчыттарбыт, олох очуругар оҕустарбыт, көннөрү күннээҕи олох, сокуон ирдэбиллэрин тутуһарга даҕаны мунаарбыт дьон эрэнэр, итэҕэйэр сирдэринэн буолар. Онон хас биирдии таһыттан киирбит киһиэхэ үлэһиттэр болҕомтолоохтук истэн, өйдөнөр гына быһааран, астыннаран ыытарга ис сүрэхтэн кыһаналлар.
Тааттатааҕы МФЦ нэһилиэк ыытар общественнай үлэтиттэн туора турбаттар, кыахтарынан спортивнай күрэхтэһиилэргэ кытталлар, билигин үтүө санааланыы елкатыгар бэлэхтэрин ууннулар, элбэх оҕолоох дьиэ кэргэни кытта шефтэһэллэр, араас акцияларга, олорор сирдэри тупсарыыга кытталлар, олох таһымын үрдэтиигэ сэмэй кылааттарын киллэрэллэр.
Улуус биир дириҥ суолталаах, тутаах тэрилтэтин коллективын үбүлүөйдэринэн эҕэрдэлиибит, кэлэр сылга доруобуйаны үлэҕэ ситиһиини, дьон-сэргэ махталын ыла тураргытыгар баҕарабыт.
А.Неустроева.
Хаартыскаҕа Тааттатааҕы МФЦ коллектива ГАУ МФЦ РС(Я)
салайааччытын солбуйааччы М.П.Ефремовы кытта.