Сыл-хонук ааһан истэҕин ахсын Улуу Кыайыыны уһансыбыт, Ытык дьоммут аччаан, кинилэр сырдык ааттара, истиҥ мөссүөннэрэ сүрэхпитигэр эрэ хаалар.
Кинилэр ааттарын үйэтитэ, оскуолабыт үөрэнээччилэрэ, учууталлара, нэһилиэкпит аҕа саастаах ветераннара буолан Кыайыы күнүн тэрээһинигэр кыттыстыбыт. Тэрээһин чэрчитинэн кылаастар икки ардыларыгар » Саллаат дьылҕата» видеоролик, Улуу Кыайыыны уһансарга күүс буолбут оччотооҕу кэм плакаттарын, хартыыналарын тыыннааҕымсытыыга, бар дьону биир тыыҥҥа кынаттаабыт, бииргэ буолууга түмпүт ырыалары, үҥкүүлэри, хоһооннору толорорго кылаастарынан күрэхтэстибит, билиҥҥи оҕо хараҕынан Кыайыы күнүн сырдаттыбыт.
Ыам ыйын 8 күнүгэр «Алдан нэһилиэгэ» тыа сирин түөлбэтин аҕам саастаахтарын кытта «Ким да умнуллубат, туох да умнуллубат» лозунунан көрсүһүү тэрийдибит. Манна хас биирдии кылаас нэһилиэкпит Ытык ветераннарыгар Кыайыы күнүн открыткаларын оҥорон туттарда. Кылаас чаастарыгар ветераннарбыт кэпсээннэрин сэҥээрэ иһиттибит.
Кыайыы 79 сылын бэлиэтиир күҥҥэ, нэһилиэкпитигэр 4 тыыл ветерана, 19 сэрии кэмин оҕото баарын биллибит.
Арҕааҥҥы уонна Илиҥҥи фроҥҥа сырдык тыыннарын толук уурбут уонна Кыайыы көтөллөнөн, төрөөбүт дойдуларыгар кэлбит саллааттарбыт тустарынан оҕолоро, аймахтара киэҥ ис хоһоонноох сырдатыыны оҥордулар. Холобур 50-тан тахса сыл оҕо иитиитигэр үлэлээбит, буойун- учуутал Петр Михайлович Колодезников сэрии толоонугар сүрэҕэр ыкса тутан илдьэ сылдьыбыт дневнигын, Ытык малын кыыһа Зинаида Петровна көрдөрдө. Рейхстаг үрдүгэр Кыһыл былааҕы өрө анньыыга бииргэ хаартыскаҕа түһүспүт, Кыайыы параадыгар кыттыбыт Петр Иннокентьевич Товаров, Сэбиэскэй Сойуус Дьоруойа Федор Матвеевич Охлопков туһунан видеороликтары көрдүбүт, ону тэҥэ хас биирдии бэтэрээн кэпсээнин сэҥээрэ иһиттибит.
Маны сэргэ Бүтүн Арассыыйатааҕы » Өлбөт-өспөт полк» , » Кыайыы түннүгэ», «Кэриэстэбил Чүмэчитэ» аахсыйаларга бука бары сүгүрүйдүбүт.
Онон, үгүс сыранан кэлбит Кыайыыны үйэлэргэ сыаналыаҕыҥ, кэнчээри ыччаппытыгар тиэрдэн иһиэҕиҥ! Билиҥҥи буола турар быһыыга-майгыга бииргэ түмсэн, эйэлээх олоҕу уһансыаҕыҥ!
Анна Кочнева – дириэктэри иитэр үлэҕэ солбуйааччы._