Оскуолабытыгар ыам ыйын 24 күнүгэр тиһэх чуораан бырааһынньыга өрө көтөҕүүлээхтик, истиҥник ааста. Ол курдук оскуоланы бүтэрэр үөрэнээччилэрбитигэр ордук суолталаах, умнуллубат, биир кэрэ бэлиэ күн буолла.
Олус долгутуулаах күммүт Арассыыйабыт уонна төрөөбүт Сахабыт сирин гимн ырыатынан саҕаланна. Алын сүһүөх кылаастары (кылаас салайааччыта Аянитова О.Ю.), орто сүһүөх үөрэнээччилэрин (кылаас салайааччыта Баишева П.К.) уонна сүрүн уопсай үөрэхтээһини түмүктүүр оҕолорбутун оскуолабыт дириэктэрэ – Гайдар Гаврильевич Винокуров, маҥнайгы учууталлара – Софья Павловна Никулина, кылаас салайааччыта – Вера Семеновна Осипова, төрөппүттэр ааттарыттан Варвара Васильевна Туласынова эҕэрдэ тылларын эттилэр, олох киэҥ суолугар үктэнэллэригэр алгыс тылларын анаатылар. Маҥнайгы кылаас үөрэнээччилэрэ «Бастыҥнар хамсааһыннарын» бэлиэтиир сөмөлүөтү бииргэ үөрэнэр табаарыстара Ангелина Жиркова эҕэрдэ тылын кэннэ, инникигэ эрэллээхтик дьулуһалларыгар анаан туттардылар. Үөрэххэ дириэктэри солбуйааччы Александра Дмитриевна Осипова педсовет уурааҕынан быйылгы выпускниктар 100% биир кэлим эксээмэҥҥэ киирбиттэрин билиһиннэрдэ. Тэрээһин долгутуулаах түгэнин 4 кылаас үөрэнээччилэрин вальса, выпускниктар үҥкүүлэрэ, ырыалара, оһуохайдара киэргэттэ.
Бу күн маанылаах ыалдьыттарынан Уус Таатта орто оскуолатын 1974 сыллаахха бүтэрбит выпускниктара буоллулар. Кинилэр саҥа оскуоланы бүтэрэр оҕолору эҕэрдэлээн, үөрэммит оскуолаларыгар ахтылҕан тылын биллэрэн, бүгүҥҥү күҥҥэ үөрэнэ сылдьар оҕолорго анаан, сынньаналларыгар, тимиртэн чочуллан оҥоһуллубут ыскамыайка бэлэхтээтилэр.
Тиһэх чуораан иккис түһүмэҕинэн үөрэххэ, үлэҕэ, научнай-практическай ааҕыыларга, спортка, араас күрэстэргэ ситиһиилэммит выпускниктары бэлиэтиир сылын аайы ыытыллар анал ааттары туттарыы церемонията буолла. Ол курдук:
Сыл бастыҥ үөрэнээччитэ анал ааты 11 кылаас үөрэнээччитэ Винокуров Слава уонна 9 кылаас үөрэнээччитэ Макарова Дарина туттулар. Анал стипендиялары Саха Өрөспүүбүлүкэтин үөрэҕириитин туйгуна, нуучча тылын уонна литературатын учуутала – Жанна Ильинична Постникова уонна Арассыыйа Бэдэрээссийэтин үөрэхтээһинин бочуоттаах үлэһитэ, история уонна обществознание учуутала – Марианна Васильевна Максимова анаатылар.
Сыл бастыҥ активиһа анал ааты Ил Дархан гранын хаһаайына, 11 кылаас үөрэнээччитигэр Готовцев Кирилга уонна 2022-2023 үөрэх дьылын үөрэнээччилэр салайыныыларын лидерыгар Попова Дашаҕа анаатылар. Анал стипендиялары Саха Өрөспүүбүлүкэтин физическэй култуураҕа уонна спортка туйгуна, оскуолабыт дириэктэрэ – Гайдар Гаврильевич Винокуров уонна Саха Өрөспүүбүлүкэтин үөрэҕириитин туйгуна, «Азия оҕолоро» пуонда стипендиата, Макаренко аатынан Бүтүн Арассыыйатааҕы бэлиэ хаһаайына, география учуутала – Полина Кирилловна Баишева туттардылар.
Сыл бастыҥ спортсмена анал ааты өрөспүүбүлүкэтээҕи Хотугу многоборье Чемпионатын кыайыылааҕа, улуус ГТОҕа, сүүрүүгэ биир бастыҥ спортсмена, үөрэнээччилэр «Спортивные Якутяне» спартакиадаларын призера, 8 кылаас үөрэнээччитэ Егасов Валентиҥҥа ону тэҥэ кыраты оҕунан, саанан ытыыга улуус призеругар 11 кылаас үөрэнээччитигэр Находкина Туйаараҕа туттардылар. Анал стипендиялары Саха Өрөспүүбүлүкэтин үөрэҕириитин туйгуна, физика уонна математика учуутала – Лидия Семеновна Иванова уонна Саха Өрөспүүбүлүкэтин физическай культураҕа, спортка уонна үөрэхтээһинин туйгуннара – Алитет Иванович Кочнев биэрдилэр.
Сыл бастыҥ талаана анал ааты оскуола лидера, өрөспүүбүлүкэтээҕи, улуустааҕы күрэс кыайыылааҕа, 9 кылаас үөрэнээччитэ Алена Колодезникова биир санаанан ылла. Анаммыт стипендияны Саха Өрөспүүбүлүкэтин үөрэҕириитин туйгуна, Макаренко аатынан Бүтүн Арассыыйатааҕы бэлиэ хаһаайына Варвара Васильевна Данилова туттарда.
Сыл уһулуччулаах ситиһиитэ анал аакка хотугу многоборье Бүтүн Арассыыйатааҕы Арктическай оонньууларын призера, 9 кылаас үөрэнээччитэ Володя Гуляев таҕыста. Киниэхэ бэйэтин стипендиятын Саха Өрөспүүбүлүкэтин үөрэҕириитин туйгуна, Саха Өрөспүүбүлүкэтин үөрэхтээһинин үтүөлээх үлэһитэ, Гражданскай килбиэн бэлиэ кавалера, Арассыыйа Бэдэрээссийэтин үөрэхтээһинин бочуоттаах үлэһитэ, өр сылларга оскуолабыт дириэктэринэн үлэлээбит Петр Гаврильевич Дягилев анаата.
Үгүс сылларга оскуолабыт үгэс буолбут тэрээһиннэрэ элбэхтэр. Олортон биирдэстэрэ сыл устата үс сүһүөҕүнэн ыытыллар «Сыл бастыҥ интеллектуала» — диэн оонньуу буолар. Быйылгы үөрэх дьылын түмүгүнэн 7 кылаас үөрэнээччитэ Тая Николаева, Дарина Макарова кыайыылааҕынан тахсан «Сыл бастыҥ интеллектуала» анал ааттары ыллылар. Оонньуу кыайыылаахтарыгар кыһыл лиэнтэлэрин иилэн туран стипендияларын педагогическай үлэ бэтэрээнэ, Саха Өрөспүүбүлүкэтин үөрэҕириитин туйгуна – Анна Алексеевна Тарабукина уонна Саха Өрөспүүбүлүкэтин үөрэҕириитин туйгуна, Арассыыйа Бэдэрээссийэтин үөрэхтээһинин бочуоттаах үлэһитэ, наставник учуутал – Василиса Петровна Неустроева туттардылар.
Неустроевтар педагогическай династияларын саҕалааччы, Саха өрөспүүбүлүкэтин «Ийэҕэ үрдүкү махтал» бэлиэ хаһаайката, «Албан аат» 1,2,3 истиэпэннээх кавалера – Анна Николаевна Соловьева анал стипендиятын 11 кылаас үөрэнээччитигэр Бурнашев Артемҥа ону тэҥэ Россия суруналыыстарын Союһун чилиэнэ, Саха Өрөспүүбүлүкэтин Учууталлар учууталлара бэлиэ хаһаайына, суруйааччы Егор Алексеевич Жирков оҕолорун анал стипендиятын 11 кылаас үөрэнээччитигэр Попова Дашаҕа туттардылар. Үтүө дьыаланы оҥорууга Егор Петрович Борисов ийэтин бииргэ төрөөбүтүн, табаарыстарын анал стипендиятын 8 кылаас үөрэнээччитигэр бастыҥ волонтерга Попов Димаҕа ананна. Педагогическай үлэ ветерана, буойун –учуутал, 2024 сылга төрөөбүтэ 100 сылын бэлиэтиир Николай Николаевич Максимов оҕолорун, дьиэ кэргэнин анал стипендиятын 9 кылаас үөрэнээччитигэр Гуляев Володяҕа ананна. Эдэр учууталлар стипедияларын 11 кылаас үөрэнээччитигэр Жирков Гошаҕа туттардылар.
Олоххо биирдэ буолар үтүө тэрээһин выпускниктар оһуохайдарынан түмүктэннэ. Таһаарааччы Даша Попова оһуокайа ыраахха диэри дьиэрэйэн, быйылгы выпускниктарбытын үрдүккэ, сырдыкка көтүттэ. Онтон оскуола сылларын тиһэх чуораанын тыаһатар чиэс маҥнайгы кылааска киирэллэригэр билии-көрүү сырдык аартыгар сирдээбит, маҥнайгы чуорааны тыаһаппыт Туйаара Находкинаҕа уонна бастыҥ үөрэнээччибитигэр, Ил Дархан гранын хаһаайыныгар Кирилл Готовцевка бэрилиннэ. Чуораан лыҥкыначчы тыаһаан, бука барыларын олох киэҥ суолугар атаарда.
Анна Софроновна Кочнева — дириэктэри иитэр үлэҕэ солбуйааччы
Уус Таатта, Таатта.