Оһуохай былыр-былыргыттан ытыктанар үҥкүү буолар. Ис хоһооно Айыы итэҕэлинэн дьон төгүрүччү тутуһан, күн хаамыытынан, үөһээ көрөн баран, “Айыы сардаҥатын түһэрэн” баҕа санааларынан ыксалаһан, үөрэ-дьүөрэ хамсаналлар. Сири-дойдуну кытта алтыһан, аар айылҕаттан күүс иҥэринэр. Хоһоон тутулунан суруллубут оһуохайы дьиэрэтэн биир киһи таһаарбытын атын дьон иилэ хабан хатылаан этэллэр. Өбүгэлэргэ махтанан, тулалыыр айылҕаны, күн-дьыл тэтиминэн, олоҕу-дьаһаҕы, үлэни-хамнаһы өрө күүрүүлээхтик уруйдууллар.
Оһуохай үс көрүҥнээх буолар: кылгастык чопчу этиллэр, орто тэтимнээх, уһун тыыннаах. Алгыс оһуохайа бииргэ сомоҕолоһон, эйэ-дэмнээх сыһыаннаах, ураты тыыны биэрэр. Саха быһыытынан култуурабытын, өбүгэбит үгэһин утумнаан, ойуулаан, хоһуйан этэр оһуохайбыт сүдү күүстээх. Түөлбэнэн тус-туспа этэллэр. Биһиэхэ оһуохай урут-уруккуттан тохтообокко, ордук ыһыахтарга, үөрүүгэ-көтүүгэ этиллэр. Таатталыы оһуохай аргыый наллаан, сыыйа хааман, сүһүөхтэриҥ бокуйан, биир тэҥ наҕыллык этиллэр. Таатта улууһугар оһуохайы оҕо-аймах сөбүлүүр.
Ахсынньы 5 күнүгэр Таатта улууһугар Ытык Күөл Духуобунас киинигэр тыйаатырга «Оҕо-аймах оһуохайын олохтуоҕуҥ!» оҕолорго оһуохай этээччилэрин сылын аайы ыытыллар Кыайыы 80 сылыгар аналлаах күөн күрэһигэр 19 оҕо кыттыыны ылла. Култуура салайааччыта И.А.Сивцева кэлбит оҕолорго туһаайан аман өһүн амалыйда. М.Г. Егорова дьүүллүүр сүбэни билиһиннэрдэ. Манна иҥэн-тоҥон Г.Л.Павлова, П.Ф.Татаринова, О.П.Андросова тигинэччи үлэлээтилэр. Быйылгы оһуохайдьыт оҕолор таҥастара-саптара тупсубут, тыллара-өстөрө чөллөрүйбүт, 7 мүнүүтэни тутустулар. Оһуохай тыла-өһө үксүлэрин киэнэ маарыннаһар. Бүлүүлүү уонна Таатталыы оһуохайы тутуннулар. Саҥа ааттар тахсан кэлбиттэрэ киһини үөрдэр. 7-12 саастаахтар бастакы бөлөххө: I Үрдэл Лев Тарасов, ЫКОО-1, сал. Попова Л.А.; II Үрдэл Селена Ноенохова, Чычымах оскуолата, сал. Решетникова М.К. ; III Үрдэл Валерия Попова, Чөркөөх оскуолата, сал. Решетникова А.Ф. 12-17 саастаах иккис бөлөххө: I Үрдэл Маша Павлова, ЫКОО-1, сал. Попова Л.А.; II Үрдэл Симона Макарова, Дьохсоҕон оскуолата, сал. Попова Е.Е.; III Үрдэл Айыллаана Попова, Дьохсоҕон оскуолата. сал. Попова Е.Е. “Тэтимнээх этээччи” анал аат Паша Харайданова, Дьохсоҕон оскуолата. сал. Попова Е.Е.; “Чуор куоластаах этээччи” анал аат Санита Макарова, Дьохсоҕон оскуолата, сал. Попова Е.Е.;“Кэскиллээх этээччи” анал аат Арылхан Слепцов, Чөркөөх оскуолата, сал. Решетникова А.Ф.; “Эҥээркэй этээччи” анал аат Санаайа Афанасьева, Чөркөөх оскуолата, сал. Решетникова А.Ф.
Кыайыылаах 6 оһуохай этээччи оҕо ахсынньы 12 күнүгэр өрөспүүбүлүкэтээҕи ”Оһуокайдаан ойуохха, эһиэкэйдээн тэйиэххэ“ кыттыыга оһуохайдьыт, алгысчыт Иван Ивановтан туоһу сурук тутан Тааттабыт аатын ааттатан кыттыыны ылыахтара.
Сандаара.