Алтынньы ый 25 күнүгэр биһиги оскуолаҕа “Оҕо үөрэххэ мотивациятыгар төрөппүт оруола” диэн тиэмэлээх уопсай төрөппүт мунньаҕа буолан ааста. Барыта 44 төрөппүт кыттыыны ылла. “Талаан — норуокка баар” уран тарбахтаах иистэнньэҥ, дэгиттэр талааннаах төрөппүттэрбит: Е.И.Сыромятникова, Т.Н.Васильева, В.Р.Шестакова, Е.В.Кириллина, М.С.Меркурьева, Н.Н.Аянитова, Н.П.Васильева, Л.В.Осипова, Т.С.Захарова, А.А.Потапова, А.А.Элякова быыстапкаларын бары сэргии, кэрэхсии көрдүбүт.
Мунньах бэрэссэдээтэлинэн А.П.Ефимова, сэкэрэтээр Н.Н.Аянитова талыллан, мунньаҕы иилээн-саҕалаан ыыттылар. Бүгүҥҥү мунньах сыалын “Оҕо үөрэххэ мотивациятыгар төрөппүт оруола буоларын” оскуола дириэктэрэ О.Н.Гуляева бэйэтин этиитинэн саҕалаата. Оксана Николаевна үөрэх хаачыстыбата үрдүүрүгэр үлэни тэрийии боппуруоһун, үөрэх чааһа аттарыллыытын, кадрынан хааччылыыны, оҕолор эбии дьарыктарын туһунан иһитиннэрдэ. Билиҥҥи кэмҥэ виртуальнай эйгэ күүскэ сайдан, сахалыы сабардамнаах толкуй мөлтөөн иһэрэ дойду үрдүнэн улахан проблема буолбута барыбытын долгутар, элбэх үлэ ыытыллара наадатын тоһоҕолоон бэлиэтээтэ.
Саха тылын, литературатын учуутала В.Д.Павлова ааҕар киһи билиилээх, билиилээх киһи сайдыылаах, сайдыылаах киһи ситиһиилээх буолара барыта ааҕыыттан тутулуктааҕын туһунан иһитиннэрдэ. Дьиэ кэргэнинэн ааҕыыга улахан болҕомтону ууран, күннээҕи олоххо киллэрэргэ санааларын эттэ. Күһүҥҥү сынньалаҥ кэмигэр ааҕар кинигэлэри билиһиннэрдэ.
Оҕо үөрэххэ дьулуура хайдаҕын, тоҕо намыһаҕын, ол туохтан тутулуктааҕын, оҕону үөрэххэ хайдах интэриэһин тардыахха сөбүй диэн хас биирдии төрөппүтү уонна учууталы барыбытын долгутар боппуруоһу дириэктэри үөрэх чааһыгар солбуйааччы О.И.Хаптагаева дириҥник ырытан кэпсээтэ. “Оҕону стимуллааһын”, “Оҕону оскуолаттан көрсүү”, “Уруок аахтарыыта”, “Оҕону оскуолаҕа атаарыы” диэн ситуацияларга бөлөҕүнэн үлэни тэрийэн ыыппыта мунньах сыалын ситэригэр олук буолла.
Дьиэ кэргэнинэн кинигэ ааҕыытыгар, оҕо күннээҕи режимин олохтооһуҥҥа, оҕону кытта чугастык алтыһыыга, сөптөөхтүк салайыыга, үөрэххэ туһаайыыга олус суолталаах этиилэр киирэн, мунньах уурааҕар бигэргэннэ.
В.Д.Павлова