Бүгүн муус устар 10 күнүгэр «Работа России. Время возможностей» бүтүн дойдутааҕы үлэ дьаарбаҥкатын бастакы түһүмэҕэ Ытык Күөлгэ буолан ааста. Тэрээһини улуус нэһилиэнньэтин дьарыктаах буолуутун киинэ салайан ыытта. Манна Н.Е.Мординов-Амма Аччыгыйын аатынан Харбалаахтааҕы үөрэх комплексын быйылгы выпускниктара, улуус оскуолаларын үөрэнээччилэрэ, үлэ көрдүүр дьон кыттыыны ыллылар.
Дьаарбаҥка чэрчитинэн И.А.Аргунов аатынан Ытык Күөллээҕи киин библиотека улуус тэрилтэлэрин кинигэлэрин быыстапкаларын туруорда. Библиограф Тамара Бочорукова оҕолорго улуус тэрилтэлэрин үлэлэрин тустарынан билиһиннэрдэ.
Амма Аччыгыйын аатынан Харбалаахтааҕы үөрэх комплексын дириэктэри үөрэх чааһыгар солбуйааччы Надежда Большакова быйылгы үөрэх дьылыгар ханнык идэлэргэ бэлэмнииллэрин, үөрэххэ туттарсарга туох саҥа уларыйыылар баалларын, саҥа ирдэбилинэн Госуслуга нөҥүө үөрэххэ туттарсар докумуоннарын ыытыахтарын сөбүн, олорор усулуобуйаларын, ханна практика барыахтарын сөбүн туһунан иһитиннэрдэ. Маны сэргэ Харбалаахтааҕы үөрэх комплексын устудьуона Василий Слепцов бэйэтэ талан ылбыт үөрэҕин уонна идэтин туһунан кэлбит оҕолорго сиһилии кэпсээтэ.
Маны сэргэ Харбалаахтааҕы «Төлөн» ААУо чох карьерын маркшейдэрэ Василий Черноградскай идэтин, ханна үөрэммитин, уол оҕоҕо техническэй үөрэх туһатын, үлэлиир тэрилтэтин бэрт сэргэхтик иһиттилэр, ыйытык биэрэн туоһуластылар.
Ол кэннэ оҕолор «Тааттаавтодор” аһаҕас акционернай тэрилтэҕэ (салайааччы Иван Бочонин) «Халыма» бэдэрээлинэй массыына суолун улахан учаастагын төгүрүк сыл көрөр-истэр, оҥорор, өрөмүөннүүр биир бөдөҥ тэрилтэтигэр профориентационнай турга сырыттылар. Экскурсияҕа тэрилтэ бэрэстэбиитэллэрин кытары көрүстүлэр, улахан уйуктаах техникалары, аспаал оҥорор собуоту көрдүлэр.
Санатан эттэххэ, бэс ыйыгар бүтүн дойдутааҕы дьаарбаҥка иккис түһүмэҕэ буолуоҕа. Үлэ көрдөнөөччүлэр СӨ үлэҕэ уонна дьарыктаах буолууга судаарыстыбаннай кэмитиэт официальнай сайтыгар билсиэхтэрин сөп.
Елена Слепцова.