Ийэ тыл, сурук-бичик күнүгэр Таатта улууһун биир кырдьаҕас, үтүө мааны дьоннордоох Чөркөөххө СӨ ситэриилээх былааһын отчуота ыытылынна. Бөлөҕү СӨ Правительствотын председателин солбуйааччы Г.М.Степанов салайан илдьэ кэлбит.
Георгий Михайлович Өрөспүүбүлүкэҕэ Ийэ тыл, сурук-бичик күнүнэн эҕэрдэлээн туран отчуоту саҕаланыан иннинэ А.И.Софронов-Алампа хоһоонун ааҕан саҕалаабыта ураты эйгэни үөскэттэ.
Отчуоту истэн баран, Октябрьскай нэһилиэк олохтоохторо долгутар сүрүн ыйытыыларын биэрдилэр уонна туруорсууларын иһитиннэрдилэр. «Ыаллыы сытар (30 км тэйиччи) Чурапчы улууһугар газ ситимэ киирдэ, Тааттаҕа кэлиэ дуо?», «Таатта уҥуор олорор ыалга автономнай хочуолунай тутуллуута кыаллыа дуо?», «Оскуола тымныы, канализацията алдьанар. Капитальнай өрөмүөн хаһан ыытыллыаҕай?», «Үүт туттарыытын механизма уларыйыа, үүккэ сыана үрдүө дуо?», «П.А.Ойуунускай аатынан театрбыт тутуута ханнык кэрчик кэмҥэ турарый?», «П.А.Ойуунускай төрөөбүтэ 135 сылын көрсө үбүлүөйүн бэлиэтииргэ СӨ Правительствотын хамыыһыйата тэриллиэ дуо?», «Анал байыаннай дьайыыга бастакынан мобилизацияҕа барбыт дьоммут хаһан төттөрү кэлиэхтэрэй?» диэн долгутар ыйытыыларын биэрдилэр.
Туруорсууга киирдэххэ, саамай сүрүн боппуруоһунан бастакынан — киин ититэр ситим хочуолунайа саахалланар туруктааҕынан, саҥа хочуолунай тутуутун, саас, күһүн Таатта эбэ уута ааһан хааларынан, быһыт тутуутун туруорсуу, нэһилиэккэ аптека аһыллыытын, баччааҥҥа диэри баланска ылылла илик ураты харыстанар суолталаах объектар, өйдөбүнньүктэр республикаҕа Культура сылынан боппуруостара быһаарыллыытын туруорустулар.
— Россияҕа норуот сомоҕолоһуутун сыла. Д.К.Сивцев-Суорун Омоллоон курдук норуоттар доҕордоһууларын өрө туппут киһи суох, үлэтэ-хамнаһа ону барытын кэрэһэлиир. Быйыл кини үбүлүөйдээх сылыгар төһө да үп-харчы кырыымчык буоллар, үбүлүөйдээх сылын үрдүк таһымҥа ыытыахха», — диэн олохтоохтор этии киллэрдилэр. А.И.Софронов-Алампа аатынан судаарыстыбаннай бириэмийэ билиҥҥэ диэри олохтоно илик. Төрөөбүт күнүгэр бириэмийэ олохтоон туттарыахха диэн туруорустулар.
Чөркөөх олохтооҕо Антонина Юрьевна Жегусова: «Биһиги дьиэ кэргэн дьоммут үлэлэрин салҕаан бааһынай хаһаайыстыбанан дьарыктанабыт. Билигин дьоммут тыа хаһаайыстыбатыгар ылбыт Граннарынан тэриммит учаастактарыгар олоробут. Бэйэбит бас билэр дьиэлэниэхпитин баҕарабыт. Биэс оҕолоохпут уонна 35 сааспытын аастыбыт. Ханнык да ипотекаҕа кыайан хапсыбаппыт.Аны туран үүт сыаната биир лиитэрэтэ 65 солк., сэлээркэ 86 солк. Онон ороскуоппутун кыайан саппаппыт. Бу маннык балаһыанньаҕа ханнык программа баарый, үлэлиирий?” – диэн элбэх оҕолоох эдэр ыал ийэтэ бүгүҥҥү күҥҥэ долгутар тыын боппуруоһун ыйытта. Оскуолаҕа оҕолорго ордук культура, спорт хайысхата баһылыыр. “Оҕолору төрүт дьарыкка сыһыаран, үөрэх тиһигэр агрохайысхалаах эбии үөрэҕи киллэриэххэ”, — диэн санаатын үллэһиннэ.