Сайыҥҥы күндэлэс күннэр түмүктэнэн, улууспут 17 оскуолата үөрэх-билии аартыгын арыйда, дуоһуйа сынньанан биллэ улааппыт, дьонноругар көмө буолбут оҕолор саҥа үөрэх дьылын саҕалыахтара.
Тааттаҕа быйылгы үөрэх дьыла улуу бөлөһүөк, айар тыл аҕата А.Е. Кулаковскай — Өксөкүлээх Өлөксөй төрөөбүтэ 150 сылыгар, саха народнай суруйааччыта Д.К. Сивцев — Суорун Омоллоон төрөөбүтэ 120 сылыгар ананыа. Ол чэрчитинэн былааннаах тэрээһиннэр буолуохтара.
Улууспут оскуолаларын оҕотун уопсай ахсаана 2822. Маҥнайгы кылааска барыллаан 279 оҕо киириэхтээх, атырдьах ыйын 31 күнүнээҕи туругунан 216 сайабылыанньа киирбит, балаҕан ыйын 5 күнүгэр диэри сайабылыанньалары ылыахтара.
Ааспыт үөрэх дьылыгар уопсайа 193 оҕо оскуоланы бүтэрдэ, бары ситии-хотуу аттестатын ыллылар. 27 оҕо бастыҥ үөрэхтээх буолан, 11 оҕо кыһыл көмүс, 16 оҕо үрүҥ көмүс мэтээллээх оскуоланы бүтэрдилэр. 84 оҕо үрдүк үөрэххэ, 95 оҕо орто анал үөрэххэ киирдилэр.
БКЭ түмүгүнэн үгүс предметтэргэ былырыыҥҥы көрдөрүүттэн орто баал бырыһыана үрдүк буолла. Ол курдук:
| Предмет | 2025 сыл (%) | 2026 сыл (%) |
| Нуучча тыла | 49,2 | 55,4 |
| Математика (профильнай) | 63,5 | 65,3 |
| Математика (базовай) | 3,8 | 4,2 |
| История | 39,2 | 51,5 |
| Английскай тыл | 54,3 | 69,6 |
| Обществознание | 44,6 | 49,4 |
ССЭ билигин да түмүктэнэ илик, балаҕан ыйын 3 күнүттэн эбии туттарыы (дополнительный период) кэмэ саҕаланар, ол кэннэ орто баал биллиэҕэ.
Сайын устата улууска 14 күнүскү, 3 балаакканан уонна 3 стационарнай лааҕыр үлэлээтэ, онно 649 оҕо сырытта, кинилэртэн 37 АБДь кыттыылаахтарын оҕолоро. Өрөспүүбүлүкэ таһыгар «Сосновый бор», «Алые паруса» лааҕырдарга 5 АБДь кыттыылаахтарын оҕолоро сынньаннылар.
Улуус оскуолаларыгар учууталларынан хааччыллыы үчүгэй. Ол курдук Чөркөөх оскуолатыгар «Земский учитель» бырагыраамманан нуучча тылын, литературатын учуутала кэллэ, Чычымахха, Харбалаахха, Дьохсоҕоҥҥо предметник учууталлар саҥа кэлэн үлэлэрин саҕалаатылар.
Таатта улууһун үөрэх салаатын дааннайыттан.