Буолаары турар “Манчаары оонньууларыгар” улууспут уратытын көрдөрөр кэнсиэпсийэ сүрүн соруктарын толорууга ыытыллар үлэлэр, чуолаан “Бренд уулуссатын” туһунан, Тааттатааҕы норуот айымньытын дьиэтин дириэктэрин солбуйааччы, бренд хамыыһыйатын салайааччыта Марианна Вячеславовна Степанованы кытта кэпсэттим:
“Бастатан туран, “Манчаары оонньууларыгар” төрүт үгэстэр алтыһыыларын тэрийиэхтээхпит. Биһиги баҕа санаабыт — хас биирдии саха ыалыгар сахалыы оҥоһук баарын ситиһии. Манна талба талааннаах уустарбыт, маастардарбыт бары оҥоһук элбииригэр күүскэ үлэлии сылдьаллар.
Иккиһинэн, дойду үрдүнэн креативнай экономика сайдыытыгар Тааттаҕа биир улахан хардыы оҥоһуллар.
“Креативная экономика включает в себя секторы, которые основаны на создании, производстве и распространении товаров и услуг, связанных с творческой деятельностью. Она опирается на талант и уникальные идеи, которые трансформируются в коммерчески успешные продукты.”
Таатта уустара оҥорон таһаарар кыахпытын үрдэтэн, дойдубут суон сураҕын үрдүктүк тутан бэлэмнэнии үлэтэ күөстүү оргуйар.
Манна сөптөөх усулуобуйаны улууспут баһылыга А. С. Бурцев, дирекция салайааччыта П. Е. Захаров, культура эйгэтин салайааччыта Г. Г. Вырдылин тэрийэннэр анал балаһыанньа оҥоһуллан биир ситимнээх үлэ тэрилиннэ.
Ф.М. Охлопков аатынан сынньалаҥ пааркатыгар “Сделано в Таатте” диэн бренд уулуссата тутуллан бүттэ. Манна олус тупсаҕай көстүүлээх саха балаҕанын курдук быһыылаах 12 норуот уус-уран оҥоһуктарын атыылыыр павильоннар турдулар.
Бу павильоннарга тапталлаах Тааттабыт уратытын көрдөрөр оһуордаах мандардаах оҥоһуктаах, уус-иис айымньылаах уопсайа 111 киһи икки сыл устата конкурстар, быыстапкалар, фестиваль түмүгүнэн сүүмэрдэнэн киирбиттэрэ, кинилэр “Манчаары оонньууларыгар” кэлбит дьоҥҥо күндү оҥоһуктары атыыга бэлэмнээтилэр.
Ол курдук хайысхаларынан :
- Мандар Уус айар үлэтэ;
- Таатта ото, чэйэ;
- Туой;
- Тимир;
- Мас;
- Талах;
- Туос:
- Кыл, сиэл;
- Муос, симэх;
- Таҥас-сап;
- Хартыына;
- Сувенирнай оноһуктар.
Павильон ис оҥоһуутун уустар бэйэлэрэ тэринэллэр. Бу маннык быыстапка-дьаарбаҥка Республикаҕа бастакытын турар, ураты көстүүлээх биир мааны түһүлгэ буолуо”.