Быйыл 2024 сылга саҥа тэриллибит «Ситим» Саха көҥүл суруйааччыларын Сойууһа ааспыт ыйга бастакы тэрээһинин Ф.И.Фадеева аатынан оҕо айымньытын дьиэтигэр «Ырыа буолбут хоһооннор» диэн кэнсиэри үрдүк таһымнаахтык ыыппыта. Бу кэнсиэр Анал Байыаннай Дьайыыга дойдубут көҥүлүн көмүскүү сылдьар саха хорсун буойуттарыгар бэйэ кыаҕынан көмө оҥорор сыаллаах-соруктаах буолбута. «Ситим» сойуус Л.И.Бандерова-Слепцова-Айыллаана, хоһоонньут бу строкалар автордара, С.А.Семенов-Сэгэй, С.Е.Кожуров-Ыстапаан Таастаах, П.П.Неустроев-Айаанньа Уус састааптаах худсовета Саха сирин араас муннуктарыгар олорор айар дьоҕурдаах дьону түмэн, бииргэ ситимнээн сэргэх уонна сонун маннык улахан кэнсиэри тэрийбитэ. Өрөспүүбүлүкэ биллэр ырыаһыттара мелодистар Люция Бандерова-Айыллаана, Николай Протопопов, Елена Нам-Чы, Алексей Потапов, Сунтаар күөрэгэйэ Людмила Спиридонова, мелодист-хоһоонньут Сэргэй Сэмэнэп – Сэгэй, мелодист-баянист – Татьяна Бандерова – Ырыа Татыйаас, ырыаһыт Марианна Федотова – Намыына уо.д.а. кэрэ куоластарын тириэрдибиттэрэ, “Махтал” (сал. Екатерина Новикова – Дьулуура), “Кэрэ эйгэ” (сал. Мария Соловьёва), “Дьоһун саас” (сал. Мария Слепцова), “Ситим” (сал. Кэрэмэс Саргы) үҥкүү ансаамбыллара тэтимнээх, сэргэх үҥкүүлэринэн көрөөччүлэр сүргэлэрин көтөхпүттэрэ. Бииртэн биир бэртээхэй хоһооннорго олохтоох мелодистар суруйбут истиҥ ырыаларын ырыаһыттар олус иэйиилээхтик толорбуттарын хайҕаан, «браво” хаһыынан лоҕуһуоллаабыттара, ытыстарын харыстаабакка таһыммыттара, үҥкүүлэри наһаа киэргэттилэр диэн биир санааҕа кэлбиттэрэ.
Бу тэрээһини «Ситим» холбоһугу көҕүлээн тэрийбит суруйааччы, кэлиҥҥи кэмҥэ дьон-сэргэ сөбүлээн ааҕар «Дьылҕа оҥоһуга», «Саха эр дьоно», «Саллаат аҕата», «Шаддат», о.д.а. кинигэлэр ааптардара, урбаанньыт, көмүс илиилээх уус Иван Парфеньевич Александров толкуйдаабыта. Кини Украинаҕа тиийэн икки ый охранаҕа үлэлээн, буола турар быһыыны-майгыны, саллааттар хайдах-туох санаалаахтарын иһиттэн билэн кэлбит киһи, онон айымньылара үксэ кинилэр кэпсээннэригэр олоҕурар. “Ситимнэр” үс чаас устата кэнсиэрдээн киллэрбит харчыларынан АБДь-га сылдьааччыларга таҥас тигэр матырыйааллары, араас көмүскэнэр тэриллэри бу күннэргэ ылбыттарын өрөспүүбүлүкэтээҕи «Илии сылааһа» иистэнэр сыах салайааччыта Ирина Егоровна Саввина иһитиннэрдэ.
«Ситим» хоһоонньуттара дойду аһын-таҥаһын кытта алгыс тыллаах анабыл хоһооннорун суруйан баһыылкаларга угаллар, хорсун -хоодуот уолаттарбытыгар этэҥҥэ буолан, кыайыы кынаттанан, дьиэлэригэр эргиллиэхтэригэр эрэнэллэр.
Анна Григорьева, «Ситим» холбоһук чилиэнэ.
Фотограф, суруналыыс Владислав Коротов түһэриилэригэр ырыаһыт, мелодист Люция Бандерова-Айыллаана, СӨ культуратын туйгуна Сэргэй Сэмэнэп – Сэгэй, таһыгар «Ситим» холбоһук бэрэссэдээтэлэ Иван Александров.