Сэтинньи 15 күнүгэр Туора Күөл орто оскуолатын спортивнай
саалатыгар, «Спортивные Якутяне» диэн республикатааҕы мини-футболга
бастыыр иһин күрэхтэһиигэ кыттарга, Таатта улууһун оскуолаларын 2011-2012
сыллаах төрүөх уолаттарга сүүмэрдиир күрэхтэһии ааста.
Барыта 8 хамаанда илин-кэлин түһүстүлэр. Ол курдук, Ытык Күөл 1№ оскуолата, лицей, Игидэй, Тыараһа, Чөркөөх, Чымынаайы уонна Туора Күөл 1, Туора-Күөл 2 хамаандалара
кытыннылар.Сэрэбиэй быһыытынан икки бөлөххө арахсан оонньуулар буоллулар.
Ол иннинэ күрэхтэһии аһыллыытыгар параадынан, гимнынан, эҕэрдэ үҥкүүтүнэн, оскуолабыт директора О.Н.Гуляева, улуус үөрэҕириитин специалиһа К.А.Ширяев кылаабынай судьуйа, оскуола физкультуратын учуутала Меркурьев А.И. тыл этиилээх саҕаланна.
Бастакы бөлөххө Туора Күөл 17 очукуолаах бастакы, Игидэй 6 очукуолаах иккис,
Лицей 3 очукуолаах үһүс, ЫК 1 №-дээх оскуолата 1 очукуолаах төрдүс миэстэлэри хааччыннылар.
Онон бу бөлөхтөн Туора Күөл1 уонна Игидэй полуфиналга тахсаллар.
Иккис бөлөххө Чөркөөх 9 очукуолаах бастакы, Туора Күөл 2 6 очукуолаах иккис,
Тыараһа уонна Чымынаайы биирдии очукуолаах, эбии хаачыстыбанан Тыараһа үһүс,
Чымынаайы төрдүс миэстэлэри үллэһиннилэр. Бу бөлөхтөн Чөркөөх уонна Туора Күөл 2
полуфиналга тахсаллар.
Бастакы полуфиналга Туора Күөл 1 уонна Туора Күөл 2 утарыта көрсүүлэрин түмүгэр
Туора Күөл 1 кыайыылаах тахсан финалга ааттанар. Иккис хамаанда боруонса мэтээл
иһин киирсэ хаалар.
Иккис полуфиналга Игидэй уонна Чөркөөх киирсиилэригэр Игидэй хамаандата
кыайыылаах тахсан финалга Туора Күөл 1 кытта киирсэр чиэскэ тиксэр.
Боруонса мэтээли Туора Күөл 2 Чөркөөҕү кытта тэҥнэһэн (бөлөххө 1:8 кыайтаран баран)
эбии пенальти тэбиитигэр кыайаннар ыллылар.
Финалга Туора Күөл 1 Игидэйи эмиэ пенальти тэбиитигэр кыайаннар (бөлөххө 5:1 кыайбыттара) кубок хаһаайынынан буоллулар.
Оскуолабыт администрацията уонна методическай холбоһуктара туруорбут сыаналаах бириистэриттэн «Бастыҥ вратарь» номинация Захаров Максим (Т-К 1), «Бастыҥ көмүскээччи» Сыроватскай Айтал (Игидэй) «Бастыҥ атаакалааччылар» Афанасьев Витя (Игидэй), Васильев Айсен (Т-К1), «Бастыҥ бомбардир» Яковлев Арсен (Чөркөөх) уонна чаҕылхай оонньуулары көрдөрөн «Бастыҥ оонньооччу» Афанасьев Саша (Игидэй) ылары ситистилэр.
Бириистэри туруорбут администрациябытыгар уонна методическай холбоһуктарга судьуйалар ааттарыттан барҕа махталбытын тиэрдэбит.
Улахан кылаас уолаттара арбитрдааннар улахан уопут ыллылар.
Бөлөхтөрүнэн уонна полуфиналларга, финалларга сытыы оонньуулар буоллулар, оҕолор баҕалара улахана көһүннэ. Мантан сүүмэрдэнэн, эбии дьарыктанан, Тааттабыт улууһун көмүскүүргэ олук уурулунна.
А.И.Меркурьев.