Муус устар 8 күнүгэр СӨ ыччат дьыалатыгар уонна социальнай коммуникацияларга миниистирэ, АБДь кыттыылааҕа Петр Шамаев Таатта улууһугар ыччаты, грант суруйааччылары, көхтөөх олохтоохтору кытары көрсөн граны суруйуу тула санаа атастаста.
Грант суруйааччылар сүрүннээн көрсүллэр күчүмэҕэйдэр, отчуоту оҥоруу, киирбит уларыйыылар тустарынан боппуруостары биэрдилэр.
Таатта улууһугар тыа сирин көҕүлүүр дириэксийэ тэриллэн көдьүүстээхтик үлэлиир. Ааспыт сылга Таатта улууһа 39 мөл. тахса грантовай харчыны киллэрэн өрөспүүбүлүкэҕэ 3 бастыҥ иһигэр киирбитэ.
Көрсүһүүгэ федеральнай уонна өрөспүүбүлүкэтээҕи грант кыайыылаахтара кыттыыны ыллылар.
Ол курдук Геннадий уонна Елена Тимченко аныыр федеральнай граннарын кыайыылааҕа Тааттатааҕы лицей уонна СӨ Ил Дарханын гранын кыайыылааҕа Дьохсоҕонтон “Ымыы” коммерческайа суох тэрилтэ бырайыактарын билиһиннэрдилэр.
Петр Шамаев бүгүҥҥү уустук кэмҥэ федеральнай уонна өрөспүүбүлүкэ көрөр граннарыгар кимиилээхтик кыттарга кыах барыбытыгар баарын тоһоҕолоон бэлиэтээтэ.
Уустук кэмҥэ тыа сирин сайыннарыыга грант харчыта төһүү күүс буоларын санатта. Кини: “Ыччат төрөөбүт дойдутугар хаалан дойдутун сайыннарыыга үлэлиэхтээх-хамсыахтаах, бас билэр дьиэлэнэн-уоттанан, уһаайбаланан, бултуур-алтыыр сирдэнэн, оттуур ходуһаланан дьиҥнээх хаһаайын буолуохтаах. Маныаха салалта усулуобуйаны тэрийиигэ бары кыаҕын ууран үлэлихтээх”,- диэн эттэ.
Анна Яковлева