Екатерина Рахлеева.
Балаҕан ыйын 27 күнүгэр Саха Өрөспүүбүлүкэтин судаарыстыбаннаһын күнүн чэрчитинэн нэһилиэкпитигэр “Сүүс саастаах Кыайыы буойуна” тэрээһин буолан ааста. Уолба нэһилиэгигэр “Сүүс саастаах буойуттар” проект бэтэрээннэр түмсүүлэрин көҕүлээһининэн үлэлээбитэ хаһыс да сыла. Быйылгы сылга сүүс сылларын туолар Аҕа дойду улуу сэриитин кыттыылаахтарынан Фрументий Абрамович Андросов-3, Георгий Денисович Никонов, Николай Сергеевич Доргуев, Николай Николаевич Туласынов, Егор Алексеевич Тарасов уонна Степан Спиридонович Бочуров буолаллар. Тэрээһини көрсө оскуолабыт оҕолоро бу буойуттар олохторун үөрэтэр сыаллаах ирдэбил үлэтин ыыттылар. Кылаастар ирдэбил үлэлэригэр суолта биэрэн, киэҥник хорутан ыыппыттарын тэрээһин кыттыылаахтара бэлиэтээтилэр, оҕолорго махтал тыллары эттилэр. Бу күҥҥэ аҕаларын, эһэлэрин, аймахтарын тустарынан сырдата, кэпсии чугас аймахтар кэллилэр. Ол курдук, улууспут кииниттэн Николай Николаевич Туласынов төрөппүт уола кэргэнинээн, чугас аймахтарынаан, маны таһынан, Егор Алексеевич Тарасов төрөппүт кыыһа уонна кийиитэ кэлэн күндү ыалдьыт буоллулар. Лейтенант Николай Сергеевич Доргуев туһунан сырдатыыны сиэн балтыта Паша Доргуева уонна Агафия Ивановна оҥордулар. Рядовой Фрументий Абрамович эдэр сааһыгар сэриигэ ыҥырыллан барбыт буолан төрөппүт оҕолоро суохтар, оскуола үөрэнээччилэрэ аймахтарын ахтыытын сырдаттылар. Рядовой Никонов Георгий Денисович туһунан тугу булбуттарын 11 кылаас үөрэнээччилэрэ кэпсээтилэр, чугас аймахтара биһиги оскуолабытыгар үөрэнэллэрин бэлиэтээтилэр. Степан Спиридонович Бочуров олоҕун туһунан төрөппүт кыыһа уонна сиэнэ сырдаттылар.
Бу күн нэһилиэкпитигэр Кыайыы 80 сылын көрсө тэрээһиннэр саҕаламмыттарын, Улуу Кыайыы күнүн көрсө 80 үтүө дьыала хамсааһын уонна “Уолба Макар Хараны ааҕар” бырайыактар стартарын биллэрэн, ыам ыйын 9 күнүгэр диэри хаалбыт хонугу ааҕар халандаарын арыйдылар.
Тэрээһин туһунан сиһилии фото-материалы көрүҥ:
