Бэс ыйын 1 күнэ Саха сиригэр саамай сырдык, ыраас бырааһынньыгынан – Оҕо көмүскэлин күнүнэн буолар. Бу күн өрөспүүбүлүкэ үрдүнэн кырачааннарга анаан араас көрдөөх оонньуулар, кэнсиэрдэр, куонкурустар ыытыллаллар.
Ол курдук, бүгүн Ытык Күөлгэ, Дьулуруйар Ньургун Боотур стадиоҥҥа «Дьоллоох оҕо саас» диэн бырааһынньык буолла. Бу күн кыттыылаахтара, улуус уһуйааннара уонна оскуола оҕолоро олоҥхо үс дойдуларын персонажтарын улахан ростовой куукула оҥороннор, сэлэлээн хааман киирдилэр.
Таатта улууһун баһылыга Айаал Бурцев оҕолору истиҥ тылларынан эҕэрдэлээтэ: «Оҕо — хас биирдии дьиэ кэргэн дьоло, олохпут салҕанар ситимэ уонна дойдубут кэскилэ. Биһиги, улахан дьон, сүрүн сорукпут — оҕолорбут этэҥҥэ улааталларыгар, талааннарын арыйалларыгар, бигэ тирэхтээх буолалларыгар бары усулуобуйаны тэрийии. Тааттабыт сирэ — талааннаахтар биһиктэрэ. Биһиги оҕолорбут үөрэххэ, спортка, айар үлэҕэ ситиһиилэринэн улууспут аатын өрүү үрдүктүк туталларыттан киэн туттабыт. Эһиги ситиһиигит — биһиги кэскилбит! Хас биирдии дьиэ кэргэҥҥэ таптал, иллээх, эйэлээх буолуу олохсуйдун! Оҕолорбут күлүүтэ тохтооботун, Тааттабыт кэскилэ өрүү чэчирии турдун!»
Таатта нэһилиэгин баһылыга Егор Павлов уонна улууспут үөрэх салаатын начальнига Иннокентий Дягилев үөрүүлээх күнүнэн эҕэрдэлээн туран, оҕолорго инникитин ситиһиилэри баҕардылар.
Эҕэрдэлэр кэнниттэн оҕолор флешмоб үҥкүүлээн, салгыы «Олоҥхо киэҥ киэлитин сэгэтэн, улаҕа уорҕатын арыйан» диэн күрэххэ уһуйаан выпускниктара олоҥхону толордулар. Кырачаан оҕолор өбүгэлэрбит улуу тылларын уйаҕас куоластарынан дьиэрэтэн, көрөөччүлэр сүргэлэрин көтөхтүлэр.
Бу тэрээһиҥҥэ Таатта улууһун араас нэһилиэктэриттэн оҕону сайыннарар кииннэр, уһуйааннар, оскуолаҕа киириэн иннинээҕи саастаах оҕолор бөлөхтөрө көхтөөхтүк кытыннылар. Кинилэр биллиилээх олоҥхоһуттар уонна суруйааччылар айымньыларыттан быһа тардыылары толорон, дьон-сэргэ биһирэбилин ыллылар:
- Чөркөөхтөөҕү «Аленушка» оҕону сайыннарар киин П.Е. Решетников – Көһөҥө Бүөтүр «Ала чуоҕур аттаах Араап Мохсоҕоллой бухатыыр» олоҥхотуттан быһа тардыыны чаҕылхайдык толордо.
- Ытык-Күөллээҕи «Кэнчээри» оҕону сайыннарар киин Сэмэн Черноградскай – Сэмэн Чуорунай «Ойор-тэбэр аттаах Оҕо Бочоох бухатыыр» олоҥхотун иһитиннэрдэ.
- Ытык-Күөллээҕи «Туйаара» уһуйаан «Олоҥхо дойдута» диэн дьиктилээх ааттаах толорууну бэлэхтээтэ.
- Уус-Тааттатааҕы «Харыйачаан» оҕо уһуйаана, Уолба орто оскуолатын уонна Туора-Күөл орто оскуолатын оскуолаҕа киириэн иннинээҕи саастаах оҕолор бөлөхтөрө, П.А. Ойуунускай «Дьулуруйар Ньургун Боотур» олоҥхотуттан быһа тардыылары толорон, улуу бухатыыр обраһын саҥаттан арыйдылар.
- Дьохсоҕон орто оскуолатын «Чэчир» бэлэмнэнии бөлөҕө, Бурнашева Ульяна Ивановна – Уйана «Кустук өҥнөөх кулунчук» олоҥхотуттан кэрчиги толордо.
- Ытык-Күөллээҕи «Сулусчаан» оҕону сайыннарар киин П. Ядрихинскай-Бэдьээлэ «Дьырыбына Дьырылыатта» олоҥхотуттан уонна Е.Г. Охлопков «Буоратай Алантай Боотур» олоҥхотуттан быһа тардыыларынан дьону-сэргэни умсугутта.
- Тыараһа орто оскуолатын оскуолаҕа киириэн иннинээҕи саастаах оҕолор бөлөхтөрө П. Ядрихинскай – Бэдьээлэ, «Дьырыбына Дьырылыатта Кыыс Бухатыыр» олоҥхотун кэрчик чааһын ырыа-тойук гынан ыллаата.
- Харбалаахтааҕы «Кэскил» уһуйаан П.Е. Решетников – Көһөҥө Бүөтүр «Күөнэ көҕөччөр аттаах күүстээх-уохтаах Күн Күндүлү бухатыыр» олоҥхотун толордо.
- Ытык-Күөллээҕи «Күн туллуктара» уһуйаан Реас Кулаковскай «Орто дойду олохтооҕо Ордьоот оҕонньор» олоҥхотуттан быһа тардыыны иһитиннэрдэ.
Барыта 12 бөлөх, сүүстэн тахса кырачаан оҕо олоҥхону толорууга кыттан, өбүгэ үтүө үгэһэ үйэлэргэ умнуллубат бигэ ситимин үөскэтэрин көрдөрдүлэр.
Бу тэрээһин оҕолорго саха тылын баайын, олоҥхо уус-уран тылын дириҥник билэллэригэр, норуоттарын култууратын ытыктыылларыгар улахан төһүү буолла.
Бу курдук үөрүүлээх, кэрэхсэбиллээх тэрээһин мини-футбол аһаҕас турнирынан түмүктэннэ.
Еремеева