А.Е. Мординов аатынан Таатта лицейигэр билии уонна саҥаны арыйыы дьиҥнээх бырааһынньыга — Билим күнэ үрдүк таһымнаахтык буолан ааста. Үөрэнээччилэр уонна педагогтар уруоктар кэннилэриттэн чинчийии уонна холонон көрүү (эксперимент) кэрэхсэбиллээх эйгэтигэр умсугуйан туран кыттыстылар.
Оҕолор араас уопуттары оҥорон көрдүлэр, билим чинчийиитин аныгы ньымаларын кытта билистилэр. Тэрээһиҥҥэ уонтан тахса билим ыстаансыйата үлэлээтэ, онно хас биирдии киһи бэйэтигэр интэриэһинэйи булла.
Ордук кэрэхсэбиллээх түгэнинэн бэһис кылаас үөрэнээччилэрэ «Докембрийскай эстии» (Докембрийский взрыв) ыстаансыйатыгар сылдьыылара буолла. Хайа боруодатын ураты дьүһүнүн көрөннөр, оҕолор «бу динозавр тиистэрэ бадахтаах» диэн сылыктаабыттара улахан сэргэхсийиини таһаарда уонна билимҥэ интэриэстэрин өссө күүһүртэ.
Билим күнэ үөрэнээччилэр билиилэрин кэҥэтэрин таһынан, инникитин саҥа ситиһиилэргэ кынаттаата. Оҕолор ураты сорудахтары толорон, бэйэлэрин логикаларын уонна айар дьоҕурдарын сайыннардылар.
Россия билимүн күнэ 1999 сылтан ыла сылын ахсын олунньу 8 күнүгэр бэлиэтэнэр. Бу бырааһынньык Россия Билимин академията төрүттэммитэ 275 сылыгар анаан Россия Президенэ Б.Н. Ельцин ыйааҕынан олохтоммута.
Таатта лицейэ Билим күнүн сылын ахсын бэлиэтиир, хас сыл аайы тэрээһин көрүҥэ уларыйар. Биһиги билим кандидаттара буолбут бастыҥ выпускниктарбытынан киэн туттабыт уонна эҕэрдэлиибит: социология билимин кандидатын Акулина Захарованы (Местникованы), техника билимин кандидаттарын Анисий Алексеевы, Ирина Савватееваны (Егорованы), мэдиссиинэ билимин кандидатын Алексей Таппаховы, физико-техническэй билим кандидатын Дьулус Никифоровы, филология билимин кандидатын Алевтина Скрябинаны (Яковлеваны). Ону кытта педагогика билимин кандидаттара буолбут ытыктабыллаах учууталларбытыгар Саргылана Иннокентьевна Огоюкинаҕа уонна Людмила Дмитриевна Сысолятинаҕа барҕа махталбытын уонна итии эҕэрдэбитин тиэрдэбит! Эһигинэн киэн туттабыт.
Сандаара Лопатина, Ксения Павлова, лицей юнкордара.