Олохтоох көҕүлээһини өйүүр бырагырааммаҕа (ППМИ) Таатта нэһилиэгэ сылын ахсын түмсүүлээхтик кыттан элбэх бырайыагы олоххо киллэрдэ. Биир бастакынан ППМИ бырагыраамматынан нэһилиэк устатынан уот тардылынна, бөһүөлэк устун киһи хаамар тротуардара оҥоһулуннулар.
Быйылгы сылга олохтоохтор уопсай мунньахтарынан түөрт бырайыак бигэргэннэ. Ол курдук 2026 сылга ППМИ бырагыраамматынан ыытыллар куонкуруска нэһилиэнньэ куоластааһыныгар маннык үлэлэр киирдилэр:
- П.Слепцов, Амгинскай, Сокольников уулуссаларыгар, К.Эллэй, Амгинскай переулоктарыгар уот тардааһына;
- Пекарскай уулуссаҕа тротуар тутуута;
- «Үйэ», «Үс реалист», «МТЗ механизатор» сквердэргэ, Кыайыы болуоссатыгар, Пушкин уулуссатыгар «Таптал», Ионова переулокка «Паарка», Ленин уулуссатыгар «Мазур» муосталарга уот холбооһуна.
- Байыаннай дьайыы бэтэрээннэригэр сквер тутуута.
Бу курдук, Ытык Күөл олохтоохторо, урбаанньыттара биир санаанан салайтаран, сомоҕолоһон, саҥаттан саҥа киирбиилэри дабайан, араас хайысхалаах бырайыактар олоххо киирэн иһэллэрэ кэрэхсэбиллээх. Инникитин даҕаны нэһилиэкпит хас биирдии олохтооҕо төрөөбүт түөлбэтэ сайдарын туһугар туора турбакка, уопсай ыытыллар үлэҕэ кылаатын киллэрэн, өйөбүл буолан, тапталлаах Ытык Күөлбүт сылтан сыл тупсан, киэркэйэн иһэригэр эрэллээхпит.
