Ил Дархан Айсен Сергеевич Николаев Саха Өрөспүүбүлүкэтин Судаарыстыбаннаһын күнүн көрсө балаҕан ыйын 24 күнүгэр киэһэ үтүө үгэс буолбут быһа эфирин бары болҕойон иһиттибит, сэҥээрэ көрдүбүт. Айсен Сергеевич Саха сирин олохтоохторун сүрүн боппуруостарын — хаарбах дьиэттэн көһүү, суол-иис сайдыытын, социальнай өйөбүлү күүһүрдүү, олох-дьаһах хаһаайыстыбатын, гаазтааһын, куораттар уонна нэһилиэктэр олорор усулуобуйаларын үрдэтии, үөрэхтээһин, доруобуйа харыстабылын, тыа хаһаайыстыбатын ырытта.
Алтынньы ый 4 күнүгэр Москуба куоракка Родимирга Дьоруой сулуһун түөһүгэр анньыахтаахтар. Биһиги уолбут Россия дьоруойун аатын ыларыгар Ил Дархаммыт өҥөтүн бэлиэтээн туран көмөтүн иһин махталбытын тиэрдэбит.
Таатта улууһун сүрүн дьарыга тыа хаһаайыстыбата буолар. Айсен Сергеевич саҥа киирээри турар механизмы ырытан сиһилии кэпсээтэ. Улуустар көрүллүбүт үбү бэйэлэрэ бас билэн хайысхаларынан араарар буолуохтара, итиэннэ үүт туттарааһыныгар, төбө ахсааныгар, үүнээйи үүннэриитигэр, оҥорон таһаарар бородууксуйаҕа бэйэлэрэ туһунан былааннаныахтара. «Улуустар кыахтара улаатар, ону тэҥэ эппиэтинэстэрэ улаатар» — диэтэ Айсен Сергеевич. Биһиги тыа хаһаайыстыбатын тэрилтэлэрин салайааччыларын кытта үлэлэһэн Тааттаҕа тыа хаһаайыстыбатын сөргүтэр кыахтанабыт.
Хаарбах дьиэлэртэн көһөрүү программата олох сайдыытыгар улахан оруолу оонньуура саарбаҕа суох — бу сылларга Таатта улууһугар саҥа таас дьиэлэр дьэндэстилэр, элбэх киһи саҥа кэм ирдэбилигэр эппиэттир дьиэлэннэ. Программа салҕанар тустааҕын истэн олуһун астынныбыт.
Өрөспүүбүлүкэ иннигэр турар биир сүрүн сорук — оҕолорбутун хаачыстыбалаахтык үөрэтии буолар. Айсен Сергеевич кыра оскуолалар сабыллыбатын, штата көҕүрэтээбэтин туһунан эттэ. Ол биһиэхэ олус үөрүүлээх сонун буолар. Биһиги улууспутугар Даайа Амма уонна Хара Алдан оскуолалара хаарбах туруктаах буолан билигин саҥа бырайыактара оҥоһулла сылдьаллар. Кэлэр сылларга кырачаан дьоммутугар саҥа оскуолалар тутуллан үлэҕэ киириэхтэрэ диэн бигэ эрэллээхпит.
Айсен Сергеевич Николаев быһа эфирыгар 3.5 чаас кэриҥэ өрөспүүбүлүкэ инники сайдыытын хайысхаларын сырдатта, олохтоохтор ыйытыыларыгар хоруйдаата, кэрэхсэбиллээх иһитиннэрии, кэпсэтии буолла,
диэн улуус баһылыга Телеграм ханаалыгар суруйда.
«Таатта» хаһыат.
