Айыыһыт сылыгар Таатта улууһугар Арассыыйаҕа Дьиэ кэргэн, Саха сиригэр Оҕо саас, Таатта улууһугар Таптал. Эрэл. Итэҕэл сылын үөрүүлээх аһыллыыта буолан ааста.
Тааттатааҕы норуот айымньытын дьиэтигэр Орто Амма нэһилиэгин «Дабайыы» сиэр-туом түмсүүтүн алгысчыта В.А.Парфенова — Арылы, норуот эмчитэ, алгысчыт С.Н. Кулачикова — Намылҕа Таатта улууһугар үүммүт сыл аһыллар үөрүүлээх тэрээһин сиэрин-туомун толордулар.
Дьоро күн бэлиэ түгэнигэр үрдүк сыанаҕа 180 сылын үөрэх эйгэтигэр таһаарыылаахтык үлэлиир, Арассыыйаҕа 2023 сылга биллэриллибит Педагог уонна Уһуйааччы сылын бастыҥ бэрэстэбиитэллэрэ Пахомовтар педагогическай династиялара (Софья Семеновна, кыыстара Анна Татаринова, сиэннэрэ Елизавета Неустроева), Үлэ сылын чулуулара Никифор, Людмила Кутугутовтар, Сергей, Анастасия Михайловтар, Изабелла, Иван Максимовтар, удьуор Лукиннар дьиэ кэргэн сыл бэлиэлэрин туттарар чиэскэ тигистилэр.
Тэрээһин үөрүүлээх чааһыгар Арассыыйаҕа биллэриллибит Дьиэ кэргэн сылын анал бэлиэтэ эдэр ыалга Святослав, Дальяна Сунхалыровтарга, Саха сиригэр биллэриллибит Оҕо саас сылын бэлиэтэ улуустааҕы үөрэҕирии салалтатын методическай салаатын салайааччыта Мира Луковцеваҕа, Таатта улууһугар биллэриллибит Таптал. Эрэл. Итэҕэл сылын бэлиэтэ Гаврил, Екатерина Вырдылиннар дьиэ кэргэҥҥэ туттарылынна.
Сыл бастыҥнарыгар өйдөбүнньүк бэлэх быһыытынан үйэлээх халандаар, онтон Таатта улууһун 17 үөрэнээччитигэр киэҥ билиилэрин хаҥатарга айан төлөбүрүн сэртипикээттэрэ туттарылынна.
Үүммүт сыл долгутуулаах аһыллыытын соһуччу бэлэҕинэн Варвара Рахлеева «Таатта үрэх үрдүгэр» эҕэрдэ ырыатын доҕуһуолунан 2025 с. ыытыллар XXII «Манчаары оонньууларын» ымыыларын сүрэхтэнниитэ буолла.
Таатта нэһилиэгин баһылыктарын ортотугар «Таатта улууһа» МО баһылыга Айаал Бурцев дьиэ кэргэнинээн Айыыһыт сылын аартыгын арыйар эҕэрдэ тылын анаата.
Умнуллубат түгэни эстрада чаҕылхай сулуһа Анатолий Горохов, «Кылыыҥкай» оҕо үҥкүү образцовай ансаамбыл (сал. Р.М.Иванова, А.М.Ефимова), «Чуораанчык» оҕо саадын иитиллээччилэрин «Сандаар» үҥкүү бөлөҕө (сал. Н. Луковцева) ылбаҕай ырыанан, сүргэни көтөҕөр үҥкүүнэн киэргэттилэр.
Таатта улууһугар сыл үөрүүлээх аһыллыыта Уолба нэһилиэгиттэн Алексей Аржаков таһаарыытынан санааны түмэр, сомоҕолуур күүстээх саха оһуохайынан түмүктэннэ.
Мария Павлова.