А.Е.Мординов аатынан Тааттатааҕы лиссиэй 2023-2024 үөрэх дьылыгар 10 кылаас үөрэнээччилэригэр Саха өрөспүүбүлүкэтин норуотун дьокутаата Виктор Николаевич Лебедев көҕүлээһининэн, промышленноска, нефтегазовай үөрэххэ туттарсар оҕолорго анал кылаас аһыллыбыта. Оҕолор үрдүк үөрэҕи бүтэрдэхтэринэ эбии үс өрүттээх дуогабар түһэрсэн, үлэ миэстэтин таһаарарга туһааннаах үлэ ыытыллар.
Сааскы сынньалаҥ кэмигэр Таатта улууһугар Хотугулуу Илиҥҥи Федеральнай университеттан преподавателлэр уонна Дьокуускай куорат оскуолатын учууталлара Таатта, Томпо быыбардыыр уокуруктан Саха Өрөспүүбүлүкэтин Судаарыстыбаннай Мунньаҕын (Ил Түмэн) дьокутаата Виктор Лебедев көҕүлээн, көмө консультациялары, уруоктары биэрдилэр. Бу тэрээһин үбүн Виктор Николаевич тус бэйэтэ уйунан, эдэр ыччат промышленноска барыыта кэҥээтин диэн иккис сылын ыытар.
Консультацияны физика предметигэр Наталия Николаевна Борисова, ХИФУ физико-техническэй институтун преподавателэ, информатиканы Сергей Сергеевич Гронин, математиканы Олесия Николаевна Попова, Дьокуускай куорат оскуолатын учууталлара биэрдилэр. Консультацияҕа улуус оскуолаларыттан 70-ча үөрэнээччи хабыллан бары предмеккэ билиилэрин хаҥаттылар. Салгыы преподавателлэр Томпо улууһун үөрэнээччилэригэр консультация биэрэ айанныыллар.
«Тыа сирин оҕолоругар маннык айаҥҥа ороскуотурбакка, дьиэлэригэр олорон, консультация ылалларыгар табыгастаах усулуобуйа. Преподавателлэр үөрэнээччилэри кытары сирэй олорон кэпсэтэн, санааларын истэллэригэр олус тоҕоостоох буолла. Виктор Николаевичка ыччат дьон эксээмэннэрин туттаран баҕарар үөрэхтэригэр киирэллэригэр кыһаллан, сүдү кылааты киллэрэ сылдьарыгар кэллэктиип аатыттан барҕа махталбытын тиэрдэбит», — диир лиссиэй дириэктэрэ Изабелла Александровна Сивцева.
Онтон Тааттатааҕы лиссиэй выпускнига: «Консультацияҕа сылдьыбыппыттан олус үөрдүм. Преподавателлэр олус тиийимтиэтик быһаараллар. Мин физика предметигэр консультация ыллым. Ыарырҕатар сорудахтарбын, хайдах суоттанарын быһааран биэрдилэр, онон физика эксээмэнин үрдүк баалга туттарар инибин», — диэн санаатын үллэһиннэ.
Үөрэнээччилэр бэйэлэрин учууталларын көмөлөрүн таһынан, маннык университет преподавателлэриттэн эбии дьарыутаммыттара үрдүк хаачыстыбаны көрдөрүө диэн эрэнэбит.
Елена СЛЕПЦОВА.