Таатта улууһугар төрдүс төгүлүн ыытыллар “Талааннаах оҕолор” өрөспүүбүлүкэтээҕи бырайыак сүбэһитэ, психологическай уонна педагогическай билим дуоктара, Москватааҕы педагогическай университет педагогика уонна психология институтун дириэктэрэ Александр Ильич Савенков ааптардаах, Саха сиринээҕи билим академиятын дошкольнай уонна начальнай отделение начальнига, бырайыак Саха сиринээҕи тьютора Ольга Николаевна Степанова салайааччылаах оскуолаҕа киириэн иннинээҕи саастаах уонна алын сүһүөх кылаас оҕолорун чинчийэр уонна творческай бырайыак күрэҕин түмүктүүр түһүмэх олунньу 28-29 күннэригэр Ытык Күөлгэ “Туллукчаан” оҕо библиотекатыгар ыытылынна.
Быйыл «математика»,«физикэ», «техника», «гуманитарнай билии», «естествознание», «тыыннаах айылҕа», «неживая природа» хайысхаларынан 124 үлэ киирдэ. Уопсайа 6 саастарыгар диэри бөлөххө 39 салайааччылаах 12 үөрэх тэрилтэтиттэн 48 уонна 7-10 саастаах оҕолор бөлөхтөрүгэр 25 салайааччылаах 76 үлэттэн 45 үлэ көрүүнү ааһан, 45 оҕо түмүктүүр түһүмэххэ киирэрэ чиэстэннэ.
Хайысхаларынан муҥутуур кыайыылаахтар, бастакы, иккис, үһүс миэстэлэр таҕыстылар. Муҥутуур кыайыылаахтар Дьокуускай куоракка ыытыллар өрөспүүбүлүкэтээҕи күрэскэ Таатта улууһун чиэһин көмүскүөхтэрэ.
Улуустааҕы күрэскэ нэһилиэк уһуйааннарыттан, алын кылаастар учууталлара талыллан, дьүүллүүр сүбэҕэ 16 эксперт үлэлэри сыаналаан, кыайыылаахтары быһаардылар.
Тапталлаах Тааттабытыгар оҕолорбут талааннара сайда, үрдүк ситиһиилэринэн үөрдэ, кынаттыы турдуннар!
Саргылана Алексеевна Рожина,
А.Е. Кулаковскай – Өксөкүлээх Өлөксөй аатынан Дьохсоҕон орто оскуолатыгар дириэктэри солбуйааччы.
