Ил Дархан А.С. Николаев Ил Түмэҥҥэ туһаайыытыгар сорох этиилэрин ордук сөбүлээтим. «Геройдар бириэмэлэрэ» кадровай Программа сүнньүнэн улуус баһылыктарын патриотическай иитиигэ солбуйааччылара баар буолуохтара, манна анал байыаннай дьайыыга сылдьыбыт ветераннар үлэлиэхтэрэ. Республикаҕа 2025 сыл Ийэ дойдуну көмүскээччилэр сылларынан биллэрилиннэ. Онон АБДь-га сылдьыбыт ветераннарга бары өттүнэн көмөлөр, олорор усулуобуйаларын тупсарыы, үлэнэн хааччыйыы, эмтээһин уо.д.а. дьаһаллар ыытыллыахтара. Оскуолаларга 2025 сылтан медик үлэлиир буолла. Ол аата оҕолорбут доруобуйаларын кэтээн көрүү, эмтээһин, доруобуйаны чэбдигирдии күн аайы ыытыллыаҕа. Муоста тутуута Өлүөнэ өрүс сүнньүгэр ууга барыаҕа, итинэн тутуу аҥара бүтүөҕэ. Алта саҥа сирдэргэ кыһыл көмүһү, таас чоҕу, вольфрамы, алтаны, сибиниэһи, сыыҥканы хостуохтара. Быйыл таас чоҕу уонна кыһыл көмүһү хостооһуҥҥа дойду үрдүнэн иккис миэстэлэргэ таҕыстыбыт. Геологтар сир баайын саппаастарын Булуҥ, Алдан, Эдьигээн, Нерюнгри, Өлүөхүмэ, Өлөөн, Томпо, Уус Майа улуустарыгар быһаарыахтара.
РФ Президенэ В.В.Путин пресс-конференциятыгар бааннар дьиэ кэргэн 6%, Уһук Илин Эҥэр 2% уонна эдэр ыалларга 2 мөл. солк субсидиялаах ипотекалары биэрэллэрин, ханнык да лимит суох буолуохтааҕын модьуйбутуттан астынным. Украинаҕа сэриини 2022 сыл Турция Стамбулугар түһэрсиллибит дуогабар усулуобуйатыгар эрэ тохтотуохха сөбүн эттэ. Ол аата Украина НАТО-ҕа дьулуспат нейтральнай государство буолуохтаах, нуучча тылын государственнай тылынан билиниэхтээх, нуучча таҥара дьиэлэригэр орооһуо суохтаах, нацизм араас көрүҥэ тохтотуллуохтаах, сэрии сэбинэн атын дойдулартан хааччыллыы суох буоуохтаах.
М.Л.Архипов, Боробул олохтооҕо, пенсионер.
@taattagazeta @ulusmedia