“Градо” архитектурнай бюро үлэһиттэрэ — эдэр тобуллаҕас өйдөөх ыччат хамаандата брендинг хамыыһыйатын кытта тэҥҥэ үлэлэһэ сылдьарын билэбит. “Градо” бюроҕа Ытык Күөл логотибын уонна саҥа ураты шрибы айан таһаарбыт графическай дизайнер, Чөркөөхтөн төрүттээх Евдокия Ивановна Попова (Захаркина) үлэлиир. Талааннаах кыыс айар үлэтин туһунан маннык кэпсиир:
“Ытык Күөл– оройуон киинин тэбэр сүрэҕэ, мантан кини устуоруйата саҕаламмыта. Аан маҥнайгы олохтоохтор бу күөл тула олохсуйаннар сыыйа тэнийэн, сайдан барбыттара. Урут Ытык Күөл араас ааттана сылдьыбыта биллэр, Үүт Күөл, Үрүҥ Күөл.
Таатта үрэх Ытык Күөлү быһа охсон ааһар, ол бэлиэтэ “Ө” буукуба буолан бөһүөлэк логотибыгар көстөр. Маны таһынан бөһүөлэк дизайн-кодугар сөп түбэһиннэрэн саҥа шрифт айбыппыт. Бу шрифт саха маҥнайгы идэтийбит худуоһунньуга Иван Васильевич Попов хаартыскаларыгар көстөр түҥ былыргы оһуорга маарынныыр. Буукубалар судургу, ууннары тарпыт курдук быһыылаахтара Таатта талаҕын санатар. Онон логотип былыргы устуоруйаны, айылҕаны, уонна дьон-сэргэ олоҕун-дьаһаҕын Ытык Күөлү кытта биир ситим гынан көрдөрөр.
Ытык Күөл логотибын уонна саҥа шрибы оҥоруу тус бэйэбэр аҥардас соругу толоруу эрэ буолбакка, тапталлаах Тааттам киэҥ далай курдук баай устуоруйатыгар умсан ылыы буолла диэхпин сөп. Тоҕо диэтэххэ бу мин ойор-тэбэр оҕо сааһым ааспыт кырдаллара, алаастара уонна дойдум сылаас тыына.
Төрөөбүт төрүт сирим миигин үрдүккэ кынаттыыр, иэйиибин уһугуннарар, айар-тутар баҕабын күүһүрдэр. Онон бу үлэни аныгы кэмҥэ, көрүүгэ сөп түбэһиннэрэн уобарас гынан таһаардым.
Бу шрифкэ уонна логотипка мин санаабар, биһиги улууспут дьонун уратыта – судургу майгыта уонна дириҥ өйө, устуоруйата уонна култуурата көстөр.
Маны тэҥэ “Манчаары оонньууларыгар” паттерн оҥорууга үлэлэспитим.
(“паттерн” – хатыланар ойуу, оһуор, орнамент)
Маҥнайгы паттерҥҥа Таатта үрэх, Таатта талаҕа уонна Моҕол Ураһа ойууланаллар. Иккис паттерҥҥа успуорт төрүт көрүҥнэрэ киирдилэр.
Бу хатыланар ойуулар дизайн-кодка сөп түбэһэннэр былаахтар ойууларыгар, таҥаска-сапка ойуу быһыытынан, онтон да атыҥҥа туттуллуохтара.
Билигин үлэм түмүгүн көрөн, улууһум уратытын көрдөрөр бэлиэлэри оҥорбуппуттан киэн тутта саныыбын.”
Бу курдук талааннаах ыччаттарбыт улууспут киинэ Ытык Күөл “Манчаары оонньууларыгар” кэлбит ыалдьыттары тупсан, киэркэйэн көрсөрүн туһугар, бу саҥа айыллыбыт ураты шрифт, логотип, паттерн бэйэлэрин соруктарын толорон, күннээҕи олохпутугар киирэн, бу Таатталар ойуулара, оһуордара, суруктара-бичиктэрэ диэн атын улуустартан ураты бэлиэбит буоларын туһугар кыһаллан айа-тута сылдьалларыттан киһи эрэ сүргэтэ көтөҕүллэр.