Захаров Петр: «Ил Дархаммыт бүгүҥҥү илдьитигэр кэккэ түгэннэригэр тохтоон ааһыахпын баҕарабын»

Ол курдук 2006-2007 сыллартан саҕалаан үөрэх эйгэтигэр доруобуйа харыстабылын үлэһиттэрэ туспа салааҕа сыһыаннаахтарынан сыыйа тохтотуллар балаһыанньата үөскээн киирэн барбыта уонна 2013-14 сыллартан саҕалаан оскуолаларбытыгар, оҕобут уһуйааннарыгар анал медиктэр штаттара сарбыллан үгүс күчүмэҕэйдэри көрсүбүппүт. Айсен Сергеевич бу балаһыанньаны толору өйдөөн кэлэр үөрэх дьылыттан үөрэх тэрилтэлэригэр медүлэһиттэри төнүннэрэргэ эппитин төрөппүт буолан туран олуһун үөрэ иһиттим. Бу олус наадалаах этии буолла. Ону сэргэ оскуолаларга үөрэх хаачыстыбатын үрдэтэр инниттэн анал тиһиктэри олоххо киллэриэхпит, үөрэх тэрилтэлэрин сирэй салайааччылара, улуустар салалталара стимулланааһыннара бу сүрүн ирдэбилтэн сиэттэриллэн тахсыахтаах диэн чопчулаан эттэ.

Аны туран демография уонна дьиэ кэргэттэри өйөөһүҥҥэ, СВО кыттыылаахтарыгар, Аҕа дойду сэриитин кыттыылаахтарыгар, огдооболоругар, тыыл ветераннарыгар, сэрии сылын оҕолоругар ураты болҕомто ууруллуоҕа диэбитин биһирээтим. Ол курдук республикатааҕы дьиэ кэргэн хапытаала үһүс оҕону оҕолонноххуна эрэ баар эбит буоллаҕына, элбэх оҕолонууну өйүүр инниттэн төрдүс, бэһис оҕолору оҕолонноххуна салҕыы көрүллэн иһиэҕэ диэтэ. Тус сыаллаах байыаннай дьайыы кыттыылаахтарын реабилитацияларыгар, эмтэниилэригэр, үлэнэн хааччыйыыга болҕомто ууруллуохтаах диэн этиитин таһынан улуустар баһылыктарыгар сүбэлиибин, патриотизмы көтөҕүүгэ анаан туһаайан ыытар үлэҕэ анал баһылык солбуйааччыта баар буолуохтаах, ол солбуйааччылары тус сыаллаах байыаннай дьайыы кыттыылаахтарын истэриттэн таһааран оҥорору тоһоҕолоон бэлиэтээтэ. Ону таһынан дойду таһымыгар «Время героев» программа сүнньүнэн үөрэхтэр баар буоллахтарына, онно хабааннаах программаны биһиги республикабытыгар үлэлэтиэхпит диэтэ.

Читайте дальше