Таатта улууһун 1984 сыллаахха оскуоланы бүтэрбит выпускниктара буолаары турар «Манчаары» оонньууларыгар бэйэбит кылааппытын киллэрсэн «Үтүө дьыала» бырайыакка кыттыһаммыт дойдубутугар айаннаан иһэн, тохтоон ааһар кыраныыссаҕа субуотунньук тэрийдибит.
Спортка, субуотунньуктарга, сэрии 80 сылыгар анаммыт араас тэрээһиннэргэ туора турбакка барытыгар биһигини көҕүлүүр, түмэр, кыайыыга кынаттыыр ылыннарыылаах тыллаах лидербит Анна Попова этиитин алы гыммаккабыт, сарсыарда эрдэттэн айаннаан дойдубут кыраныыссатыгар тиийдибит. Айылҕа силигилии сиппит сыта илгийэ түстэ. Бары да санаабыт өрө көтөҕүллэн, утары айаннаан кэлбит оҕолорбутун кытта көрсүһэн үөрүүбүт өссө үксээтэ. Күргүөмнээх үлэ тыаһа-ууһа урукку пионер, комсомол кэмнэрбитин санатта.
Биһиги выпуспут кыттыылааҕа, Тыараһа олохтооҕо Сусанна Николаевна Нахова тыл көтөҕөн, Тыараһа нэһилиэгин дьаһалтатын, олохтоох култуура үлэһиттэрин сэргэ, Таатта улууһун 1984 выпустара барыта 18 — куораттан 8, Тааттаттан 10 буолан, сууйуу-сотуу, ыраастааһын, кырааскалааһын үлэтин толордулар, сибэкки хоруудаларын оҥорон олортулар. Күргүөмнээх үлэбит түмүгэр кыраныыссабыт атын көстүүлэнэн ыалдьыттары көрсүөҕэ! Субуотунньукка кэлиини-барыыны хааччыйбыт үөлээннээхтэрбитигэр Семен Байбаллыковка, Афанасий Дедюкиҥҥа, инструменнарынан, сибэкки иһитигэр матырыйаалларынан көмөлөспүт Василий Макаровка махталбыт улахан. Таатта 1984 выпускниктара бары ыҥырыыны ылынан, бэрт түргэнник харчынан кыттыһан 27 киилэ күрүө сотор кырааска, 100 устуука петунья сибэкки ылыллан күүс-көмө буолбуттарыттан олус үөрэбит. Бырайыакпыт табыллыбытыттан бары да үөрдүбүт, дьоллоннубут. Маннык бука бары түмсүүлээх, төрөөбүт дойдуга бэриниилээх, кыайыыга-хотууга дьулуурдаах буолуоҕуҥ! Төрөөбүт дойдубутунан киэн туттабыт!
Бэйэбит инф.