Бүгүн Үлэ, Эйэ, Сомоҕолоһуу күнүн көрсө Харбалаахха улахан субуотунньук тэрилиннэ. Манна оҕотуттан оҕонньоругар тиийэ күргүөмнээхтик тахсан, халаан уута кэлиитигэр бэлэмнэнэн кумаҕы кууллааһын көхтөөхтүк барда.
Орто Амма нэһилиэгэ 1998 сыллаахха 86% ууга баран, кыһалҕа бөҕөнү көрсүбүтэ. Кэнники 2009, 2010 сылларга эмиэ элбэх ыал дьиэтэ ууга былдьанан, сытыйыы-эмэҕирии, тэллэй буолуу эрэйин билбиппит. Онон хас саас аайы олохтоох дьаһалта тэрийиитинэн маннык субуотунньуктар буолан, намыһах сирдэри бүөлүүргэ эрдэттэн бэлэмнэнии буолар.
Бүгүҥҥү субуотунньукка үгүс киһи баҕатынан кэлэн үлэлээн, начаас икки ардыгар кууллары толоро оҕустулар. Ол иһин да, «Норуот күүһэ — көмүөл күүһэ!»- диэн мээнэҕэ эппэттэр! Аны көмүөлбүт этэҥҥэ ааһарын эрэнэ күүтэбит!
Валентина Кривошапкина.