Бүгүн алтынньы 16 күнүгэр Аҕа дойду сэриитин бэтэрээнэ, педагогическай үлэ уонна РСФСР успуордун бэтэрээнэ, «Үйэ саас» Ытык бэлиэ хаһаайына Наум Трифонович Слепцов П.А.Ойуунускай аатынан Саха Өрөспүүбүлүкэтин Государственноһын музейыгар ыалдьыттаата.
Октябрьскай нэһилиэк баһылыга Андрей Петрович Семеновы, үөрэппит оҕолорун Диана Афанасьевна Сивцеваны, Полина Фёдоровна Кычкинаны, Светлана Прокопьевна Слепцованы кытта көрүстэ, ирэ-хоро сэһэргэстэ.
П. А. Ойуунускай аатынан орто оскуола үрдүкү кылааһын оҕолоро Ытык кырдьаҕас олоҕун туһунан бэйэ кэпсээнин иһиттилэр уонна ыччат дьоҥҥо анаан алгыс тылын иҥэриннилэр. Наум Трифонович «Ценить и чтить — это и есть величие народа«, — диэн үс киинэттэн турар киэн ис хоһоонноох бэйэ оҥоруута видео киинэни музей фондатыгар бэлэх биэрдэ. Бу улахан үлэ нэһилиэккэ, улууска былааннаахтык көрдөрүллэр инникилээх.
Ытык кырдьаҕаспыт Наум Трифонович «Үөрэҕи, успорду өрө тутун, ийэлээх аҕаҕытын таптаан, харыстаан… «, — диэн баҕа санаатын эттэ.
Алгыс баһа сыаланнын!