Балаҕан ыйын 1 күнэ — Билии бырааһынньыга үүннэ. Сарсыардаттан Өксөкүлээх Өлөксөй аатынан сквергэ оҕо аймах муһунна. А.Е. Кулаковскай аатынан Дьохсоҕон орто оскуолатыгар быйылгы үөрэх дьылыгар 83 оҕо үөрэниэ. Маҥнайгы кылааска киирэр 8 оҕо бу бырааһынньыкка кинилэр сүрүн дьон буолалларын сүрэхтэринэн таайан, ийэлэрин аҕаларын илиитин кырачаан ытыстарынан бобо тутан тураллар. Бүгүҥҥү күнтэн ыла кинилэр оскуола үөрэнээччилэрэ буоллулар, маҥнайгы учууталларын кытта көрсүөхтэрэ, анаан үөрэппит хоһооннорун доргуччу ааҕыахтара. Учууталлара Анна Васильевна Сивцева барыларыгар билии күлүүһүн бэлэх уунна.
Ааспыт үөрэх дьылыгар Дьохсоҕон оскуолатын 8 оҕо бүтэрбитэ, бары баҕалаах үөрэхтэригэр киирдилэр. 3 оҕо үрдүк, 5 оҕо орто анал үөрэх студеннара буоллулар. 9-10 кылаастартан 7 оҕо үөрэххэ киирдилэр. Быйыл 11 кылааска 4 оҕо үөрэниэ. Кылаас салайааччыта Мария Владимировна Сивцева.
Харайданова Сайыына Алексеевна английскай тыл, Куличкина Милана Михайловна алын кылаас учууталлар саҥа үлэлии кэллилэр.
Улуустааҕы үөрэх салаатын начальнигын солбуйааччыта Татьяна Алексеевна Тютрина учууталларга, үөрэнээччилэргэ эҕэрдэ тылларын эттэ.
Саҥа үөрэх дьыла үгэс курдук алтан чуораан тыаһынан саҕаланна. Быйыл маҥнайгы кылааска киирбит Влада Местникова уонна оскуола выпускнига Айтал Бабанов чуорааны лыҥкыначчы тыаһаттылар.
Сарыал Кыыма