Таатта нэһилиэгэр А.И.Софронов – Алампа аатынан Ытык Күөл 1-гы нүөмэрдээх орто оскуолаҕа алтынньы 16 күнүгэр баһаарынай үөрэхтээһин буолла. Тааттатааҕы 32 №-дээх баһаарынай чаас састаабынан тахсан үөрэхтээһиҥҥэ үлэлээтэ. Манна быйыл Тааттатааҕы баһаарынай чааска саҥа кирилиэстээх массыына кэлэн үс этээстээх оскуолаҕа түннүгүнэн тахсан дьону быыһыахтааҕын көрдөрдүлэр.
Күнүс 2 чаас 10 мүнүүтэҕэ биллэриллибит суһал сигнал кэннэ тута баһаарынай массыына оскуолаҕа кэллэ. Манна 354 үөрэнээччи, 54 үлэһит аварийнай аанынан таһырдьа таҕыстылар. 24 миэтирэлээх кирилиэстээх баһаарынай массыына 5 мүнүүтэнэн уот турбут сиригэр кэллэ.
Уот турбутун туһунан иһитиннэрии киирбит кылааһыгар үһүс этээс түннүгүнэн тахсан, байыастар ыйыллыбыт бириэмэҕэ сөп түбэһэр хамсаныылары оҥорон сөптөөхтүк дьаһаннылар. Үөрэхтээһин хаамыытын туһунан баһаары сэрэтэр инструктора Ирина Мартынова кэпсээтэ:
Быйыл 32-с нүөмэрдээх баһаарынай чааска 24 миэтирэ уһуннаах кирилиэстээх баһаарынай массыына улууска кэлбитэ. Массыынаны ыытыыга, хайдах быһыылаахтык кирилиэһи туттууга байыастар үөрэх ааһаннар, бүгүн бу биир улахан үөрэхтээһин буолла. Элбэх үөрэнээччилэрдээх, үлэһиттээх улахан оскуола буолан, баһаарынай массыыналар, үлэһиттэр толору састаабынан таҕыстылар. Кыра итэҕэстэр бааллар, ол эрэн оскуола кэллэктиибэ үөрэхтээһиҥҥэ бэлэмнээҕин көрдөрдө диэххэ сөп. Оттон байыастарга маннык көрүҥнээх үөрэхтээһин бэйэлэрин профессиональнай таһымнарын үрдэтэллэригэр, итиэннэ уоту умуруорууга саҥа, сонун ньымалары тобулалларыгар олус туһалаах уонна наадалаах.
Елена Слепцова.