Бэҕэһээ, ыам ыйын 6 күнүгэр Таатта улууһун култууратын үлэһиттэрин идэлээх сойуустарын тэрийиитинэн Улуу Кыайыы 80 сылынан биир идэлээх бэтэрээннэрин чиэстээтилэр.
Улуустааҕы норуот айымньытын дьиэтин дириэктэрэ Гаврил Гаврильевич Вырдылин, Таатта улууһун бэтэрээннэрин сэбиэтин бэрэссэдээтэлэ Маргарита Арисовна Попова ытык кырдьаҕастары арыаллаан “Манчаары оонньууларыгар” тутулла турар эбийиэктэринэн экскурсияҕа сырытыннардылар. Экскурсия кэнниттэн “Алгыс” балаҕаҥҥа итии чэйдээх остуол тула олорон истиҥ сэһэргэһии тэрийдилэр. Тэрээһини сыана бэтэрээнэ Илларион Сидоров, Ф.С. Аргунов аатынан оҕо ускуустубатын оскуолатын оркестра, күүстээх куоластаах ылбаҕай ырыаһыт Георгий Матаннанов киэргэттилэр.