Бэҕэһээ Октябрьскай нэһилиэк биир улахан общественнай » Утум» кыраайы үөрэтээччилэр түмсүү тэриллибитэ 15 сылын бэлиэтиир «Дойду сурахтаах, алаас ааттаах» диэн ааттаах отчуоттуур быыстапкалара тэрилиннэ.
Салайааччы П.Ф.Кычкина тэрийиитинэн биир санаалаахтар мунньустан нэһилиэк историятын хомуйан, суруйан сыл ахсын саҥаттан саҥа үлэлэри таһаараллар. Ытык мааны «Утум» түмсүү кыттыылаахтара 15 сыл устата кырдьаҕас Чөркөөх историятын үөрэтиигэ, нэһилиэккэ олорон ааспыт бас-көс, ытыктанар үлэһит дьону үйэтитиигэ үгүс сыралаах, хорутуулаах үлэни толордулар, сонордьут кэриэтэ барытын хасыһан булан, эридьиэстээн суоруллубат гына суруйдулар. Киһи астынара үйэлэргэ бараммат кэпсээннээх — «Чөркөөх» кинигэ матырыйаалын барытын булан, мунньан — кэнчээри ыччаппытыгар духуобунай, өй-билии, архыып хапытаалын күн сирин көрдөрөн хааллардылар. Икки тому таһаарбыттара, билигин үһүс том тахсыахтаах.
«Утум» общественнай түмсүү кыттыылаахтара биир санаалаах, биир сыаллаах-соруктаах дьон мустан улахан үлэни кыайа-хото тутан үмүрүттүлэр, нэһилиэк ыытар общественнай олоҕор көхтөөхтүк кытталлар, эдэр көлүөнэҕэ бастыҥ наставниктар, холобур буолаллар.
Бу бэлиэ күннэринэн Октябрьскай нэһилиэк баһылыга Семенов А.П., музейдарыттан Аржаков М.Г., Аввакумова С.В., тэрилтэлэр, түмсүүлэр уо.д.а. эҕэрдэлээтилэр, күүс-көмө, бигэ тирэх будьолалларыгар махтаннылар, өссө да айымньылаах, таһаарыылаах үлэни, чэгиэн-чэбдик доруобуйаны баҕардылар.
Бэйэбит инф.