Тохсунньу ый 9-10 күнүгэр «Тааттатааҕы сокуоннай саастарын ситэ илик оҕолору чөлүгэр түһэрэр «Эрэл» киин», «Таатта нэһилиэгин» МТ, «Таатта нэһилиэгин» МТ «Сарыал» культуратын киинэ V улуустааҕы мууһунан скульптура оҥоһуктарын күрэҕин оскуола оҕолорун уонна скульптураны сэҥээрэр маастардарын икки ардыларыгар «Саарыннар ыллыктарынан» бырайыак чэрчитинэн «ТААТТА МУУС-2023» күрэҕи тэрийдэ. Таатта улууһун олохтоохторугар, ыалдьыттарыгар уонна оҕолорго үгүс үөрүүнү-көтүүнү, дьиктини-кэрэни Саҥа дьылы көрсө бэлэх уунна.
2019 сылтан ыытыллар «ТААТТА МУУС» күрэс V-с үбүлүөйдээх сылыгар улуустан 9 хамаанда көхтөөхтүк кытынна. Манна хамаанда састаабыгар 1 маастар, 2 оскуола оҕото эрдэттэн быйылгы күрэххэ «Аан дойду кэрэтин кэрэхсээн» тиэмэҕэ сайдыы олоҕун ким хайдах төлкөлөөн көрөрүн, сүбэлэһэн, толкуйдаан, сатабылларынан салайтаран 2 күн иһигэр тигинэччи хамсанан, мууһунан араас дьикти уобарастары айан таһаардылар.
Күрэс кыттыылаахтара күһүнүн мастан скульптура уһаныытыгар, кыһынын мууһунан оҥоһук күрэһэр «быйыл халлааммыт урукку сыллардааҕар сылыйан уустуктары үөскэппэтэ, онон бэриллибит бириэмэҕэ тиэмэни сөпкө арыйан сыалбытын ситтибит«- диэн санааларын үллэһиннилэр.
«ТААТТА МУУС-2023» улуустааҕы күрэс кыайыылаахтарынан, «Кылаан чыпчаала» хаһаайыттара, Өлүөнэ очуостара» оҥоһуктаах Дьүлэй нэһилиэгин хамаандата, маастар Алквиад Павлович Атастыров, Саян Атастыров, Кузьма Кузьмин. 1 үрдэл «Тымныы полюһа» үлэлээх, Уолбаттан Василий Еремеевич Попов, Хомустаан Афанасьев, Егор Капитонов. 2 үрдэлгэ «Китайский дракон» уобарастаах, Ытык Күөлтэн Василий Александрович Назаров, Афоня Никифоров, Артем Христофоров. 3 үрдэл «Дьүкээбил» тиэмэни айан, Уолбаттан Иван Трофимович Боппосов, Дьулус Боппосов, Харитон Постников буоллулар. Кыайыылаахтар мэтээлинэн, анал ааттаах добун суруктарынан, сыаналаах бириистэринэн, харчынан наҕараадаланан үөрүүлэрэ үксээтэ.
Бу күн Ытык Күөл нэһилиэгин киин болуоссата, бииртэн биир олус үчүгэй, кэрэ, ураты быһыылаах-таһаалаах муус оҥоһуктарынан киэргэннэ!
Октябрина Протопопова.