Олохпут балысханнык сайдан, цифровизация араас программалара тэтимнээхтик оҥоһуллан күннээҕи олохпутугар, промышленноска роботтар киһини солбуйан күүскэ туттуллар буолбут кэмнэригэр хас биирдии оскуола иитэр уонна үөрэтэр тосхолугар оҕо – аймах интэриэһин күүскэ тардар биир сүрүн хайысхатынан робототехника эйгэтэ буолар. Маннык санаанан салайтаран муус устар 19 күнүгэр В.И.Ленин аатынан Уолба орто оскуолата улуус 4-11 кылааһын үөрэнээччилэригэр “АйРобоДрон” диэн робототехническэй сонун турниры бастакытын тэрийэн ыытта. Тэрээһин үөрүүлээх чааһыгар улууспут үөрэҕин салалтатын начальнига Иннокентий Иннокентьевич Дягилев сонун тэрээһининэн оҕолору эҕэрдэлээтэ уонна быйылгы үөрэх дьылыгар Ил Дархан сорудаҕынан ыытыллар “Спортивные Якутяне” республика оҕолорун спартакиадаларыгар Уолба уонна Уус Таатта оҕолорун хамаандата республикаҕа кыттан, БАС- беспилотнай авиационнай системанан хааччыллыылаах оскуолалары куоһаран 3 миэстэни ылбытын, оҕолор улуус чиэһин ситиһиилээхтик көмүскээбиттэрин иһитиннэрдэ, хамаандаҕа махтанна. Уолба оскуолатын директора Алексей Валентинович Аржаков оскуолаҕа робототехника куруһуога үлэтин ситиһиилээхтик ыытарын бэлиэтээтэ, салайааччылар Данилов Дмитрий Павлович уонна Харайданов Александр Гаврильевич бу ыытар сонун тэрээһиннэрэ инникитин кэскиллээх буоларын тоһоҕолоон бэлиэтээтэ, турнир кыттыылаахтарыгар ситиһиини баҕарда. Улуустааҕы “Гонки дронов” түмсүү салайааччыта, Уус Таатта оскуолатын эбии үөрэхтээһин педагога Иван Николаевич Лебедев оҕолор хамаандалара “Спортивные Якутяне” спартакиадаҕа кыттыыларын сырдатта уонна миэстэлэһэн ылбыт кубоктарын үөрүүлээх быһыыга улуус үөрэҕин салалтатыгар туттарда.
Турнирга улуус түөрт оскуолатыттан 32 үөрэнээччи робототехника биэс көрүҥэр уонна техническэй симулятор көмөтүнэн дрону көтүтүү күрэһигэр күөн көрсөн илин – кэлин түһүстүлэр. Түмүгэр “Интеллектуальнай 15х15сумоҕа” 1 миэстэни Максим Рахлеев, 7 кылаас (Уолба), 2 миэстэни Эрсан Аянитов, 5 кылаас (Уус Таатта), 3 миэстэни Коля Птицын, 7”б” кылаас (Ытык Күөл № 2 оскуолата), “Робот – погрузчик” — 1 миэстэни Рахлеев Павел, 7 кылаас (Уолба), 2 миэстэни Сидорова Диана, 7 кылаас (Ытык Күөл № 2 оскуолата), 3 миэстэни Птицын Коля, 7”б” кылаас (Ытык Күөл № 2 оскуолата), “Кэтит сурааһынынан айан” – 1 миэстэни Колодезников Яков,5 кылаас ( Уус Таатта), 2 миэстэни – Макаров Анисим, 8 кылаас (Уус Таатта), 3 миэстэни – Собакин Руслан, 6 кылаас (Уолба), “Хомуур сумоҕа” 1 миэстэни – Хастаева Диана, Рахлеев Павел хамаандалара, 7 кылаас (Уолба), 2 миэстэни – Бабанов Жора, Попов Айастан хамаандалара, 6 кылаас, (Ытык Күөл № 2 оскуолата), 3 миэстэни – Корякин Молот, Хаптагаев Айыллаан хамаандалара, 6 кылаас (Ытык Күөл № 2 оскуолата), “Робофутболга” 1 миэстэни – Рахлеев Максим, Рахлеев Павел хамаандалара, 7 кылаас (Уолба), 2 миэстэни — Корякин Молот, Хаптагаев Айыллаан хамаандалара, 6 кылаас (Ытык Күөл № 2 оскуолата), 3 миэстэни — Бабанов Жора, Попов Айастан хамаандалара, 6 кылаас, (Ытык Күөл № 2 оскуолата) ылары ситистилэр, бэлэх туттулар. Улууска бастакытын ыытыллар техническэй симулятор көмөтүнэн дрону көтүтүү күрэһигэр саҥа оонньооччулар ыккардыларыгар уолаттарга: 1 миэстэни – Михайлов Руслан, 7 кылаас (Ытык Күөл № 1 оскуолата), 2 миэстэни – Макаров Анисим , 8 кылаас (Уус Таатта), 3 миэстэни – Васильев Дима, 7 кылаас, (Уус Таатта), кыргыттарга: 1 миэстэни – Сайнара Собакина, 5 кылаас (Уолба), 2 миэстэни – Диана Сидорова, 7 кылаас, (Ытык Күөл № 2 оскуолата) ылылар. Бу көрүҥҥэ лигаҕа уолаттарга: 1 миэстэни Тарабукин Сеня, 7 кылаас (Уус Таатта), 2 миэстэни Собакин Руслан, 6 кылаас (Уолба), 3 миэстэни Аммосов Владик, 6 кылаас (Уус Таатта), кыргыттарга: 1 миэстэни Собакина Айсана, 8 кылаас (Уолба), 2 миэстэни Данилова Настя, 9 кылаас (Уолба), 3 миэстэни Лебедева Александрина, 6 кылаас (Уус Таатта) ыллылар.
Турнир экспертэринэн кыттааччылары илдьэ кэлбит куруһуок салайааччылара: Иван Николаевич Лебедев (Уус Таатта), Александр Николаевич Пономарев (Ытык Күөл № 1 оскуолата), Сергей Иванович Бехтюев (Ытык Күөл № 1 оскуолата), Протопопов Андрей Климович (Ытык Күөл № 2 оскуолата), Данилов Дмитрий Павлович (Уолба), Харайданов Александр Гаврильевич (Уолба), Аржакова Айыына Альбертовна (Уолба) үлэлээтилэр.
Тэрээһин “Ил Ситим” оҕо тэрилтэтин үҥкүүтүнэн, Сайнара Собакина эҕэрдэ ырыатынан киэргэтилиннэ. Оскуола медиа киинэ тэрээһин устата тиһигин быспакка үлэлээтэ, сырдатар үлэҕэ матырыйаал бэлэмнээтэ.
Бу курдук оскуолабыт биир сонун тэрээһинэ оҕолору, учууталлары, нэһилиэк олохтоохторун түмэ тарта. Үгэс быһыытынан сүүрбэттэн тахсалыы сыл ыытыллар “Мындыр өй” алын кылаас үөрэнээччилэригэр аналлаах интеллектуальнай олимпиада, мас тардыһыытыгар “Сезон арыллыыта, “Сезон сабыллыыта” аһаҕас чемпионаттар, И.С.Кочкин бирииһигэр көҥүл тустууга аһаҕас турнир, “Уолба сулустара” ырыа күрэһин, “Көтө-дайа кустуктана” үҥкүү бырааһынньыгын курдук сыллата ыытыллар үйэлээх тэрээһин буоларыгар эрэнэ тарҕастыбыт.
Анна Боппосова, Уолба