Тааттаҕа политическай репрессия сиэртибэлэрин кэриэстиир күн

Алтынньы 30 күнүгэр Таатта улууһугар политическай репрессия си­эртибэлэрин күнүн бэлиэтээн, ахтан, санаан Халамнаайы күөл үрдүгэр баар мэҥэ тааска сибэкки дьөрбөтүн уур­дулар.

Бу күнү сымыйа балыыртан хаайыы дьылҕаламмыттар бэйэлэрэ туруорсу­буттара. 1991 сыл алтынньы 18 күнүгэр РСФСР Үрдүкү Сэбиэтин Ыйааҕынан анал күн бигэргэммитэ. Дойду үрдүнэн ыытыллыбыт политическай хамсааһыннар мөлүйүөнүнэн киһини «норуот өстөөҕө» оҥорон, хаайыыга умса аспыттара, быстах дьылҕалаабыттара.

Таатта улууһун бу кэмҥэ үс төгүл атый­ахтаах уу курдук ыар ытарча — репрессия аймаан ааспыта. Тыһыынчаттан тахса киһи репрессияҕа түбэспитэ, 359 — хаай­ыыга, 324 — сууттаммыта, 57 киһи ытыл­лыбыта.

Быйыл Георгий Федорович Сивцев төрөөбүтэ130 сылын туолбута. Кини Сэбиэскэй былааһы олохтоспут биир көхтөөх кыттааччынан буолар. Тааттатааҕы кыраайы үөрэтэр «Албан аат» түмэлин салайааччыта Маргари­та Арисовна Попова Саһыл Сыһыы оборуонатын түмүктэспит, репрессия тыҥыраҕыттан суорума суолламмыт биир дойдулаахпыт туһунан олус сэргэх­тик кэпсээтэ. Ааспыт үйэ сүүрбэһис сыл­ларыгар Георгий Федорович Сивцев П.А.Ойуунускайы, М.К.Аммосовы, А.Е.Кулаковскайы, А.И.Софроновы кытары бииргэ түспүт хаартыскаты­гар бэрт ыраас сэбэрэлээх, баттаҕын өрө тарааммыт, интеллигентнэй, сахаҕа бөдөҥ-садаҥ көрүҥнээҕин туһунан сырдатта. Елена Филимоновна Кузьмина суруйбут «Георгий Федоро­вич Сивцев» диэн кинигэ 85 сирэйигэр архыып до­кумуоннарыгар олоҕуран, Георгий Федорович 1956 сыл муус устар 28 күнүгэр реабилитацияламмытын туһунан ааҕыахха сөп.

 

Елена Слепцова